Shymkentte alma baǵyn salmaq bolǵandar 8 jylǵa bas bostandyǵynan aıyryldy

ShYMKENT. KAZINFORM — Memleketke 685,8 mln teńge materıaldyq shyǵyn kelgen.

«Agrarlyq nesıe korporatsııasy» AQ-nyń qyzmetine júrgizilgen keshendi tekserý nátıjesinde Shymkent qalasynda júzege asqan «eki alma baǵyn salý» jobasy boıynsha memleketke iri kólemde materıaldyq shyǵyn keltirilgeni anyqtaldy. Bul jobany qarjylandyrǵan «Aýyl sharýashylyǵyn qoldaý qory» AQ basshylyǵy qyzmettik ókilettikterin asyra paıdalanyp, oryndalmaǵan jumystardy qabyldaǵan.

Atap aıtqanda, «Agrarlyq nesıe korporatsııasy» AQ basqarma tóraǵasynyń burynǵy orynbasary men ónim berýshi kompanııa dırektory Shymkenttegi alma baqtarynyń tehnıkalyq talaptarǵa jáne óndiristik kórsetkishterge saı kelmeıtinine qaramastan, jobany qabyldap alǵan. Saraptamalar men mamandardyń qorytyndysy boıynsha, memleketke keltirilgen jalpy materıaldyq shyǵyn kólemi 685,8 mln teńge bolǵan.

Osy derekter boıynsha qylmystyq is qozǵaldy. Tergeý Shymkent qalasy boıynsha ekonomıkalyq tergep-tekserý departamentine tapsyryldy.

Shymkent qalasynyń qylmystyq ister jónindegi aýdanaralyq soty úkim shyǵaryp, burynǵy orynbasar men merdigerdi kináli dep tanyp, olardyń árqaısysyna 8 jyl merzimge bas bostandyǵynan aıyrý jazasyn taǵaıyndady. Sonymen qatar, sot múlikterin tárkileý týraly sheshim qabyldady.

Aıta ketý kerek, úkim áli zańdy kúshine engen joq.

Aıta keteıik, budan buryn Shymkentte tanymal kofe brendin zańsyz paıdalanǵan top ustalǵanyn jazǵan bolatynbyz.