Shymkentte alıment tólemegen 31 adam qylmystyq jaýapqa tartyldy
ShYMKENT. KAZINFORM — Shymkentte jyl basynan beri alıment tóleýden jaltarǵan 31 adamǵa qylmystyq is qozǵaldy. Bul týraly qalalyq ádilet departamentiniń basshysy Aınur Isabekova brıfıngte málimdedi.
Búginde Shymkentte alıment óndirýge qatysty 13 845 atqarýshylyq is tirkelgen. Onyń 3 287-sinde bereshek qalyptasqan, ıaǵnı bul boryshkerler úsh aıdan astam ýaqyt alıment tólemegen.
— Mundaı jaǵdaıda sot oryndaýshylary májbúrlep óndirip alý sharalaryn qoldanady. Bıyl alıment tóleý mindetin oryndamaǵan 31 adamǵa qatysty qylmystyq is qozǵaldy. Sondaı-aq 215 adam ákimshilik jaýapkershilikke tartylyp, onyń ishinde 132 boryshker ákimshilik qamaqqa alyndy, — dedi Aınur Isabekova.
Onyń aıtýynsha, alıment boıynsha bereshegi bar azamattar jergilikti mansap ortalyqtary arqyly jumysqa ornalasa alady. Bıyl sot oryndaýshylarynyń kómegimen 254 boryshker jumysqa ornalasqan.
Sonymen qatar qalada búginde 163 sot oryndaýshysy jumys isteıdi. Onyń segizi — memlekettik, qalǵany — jekemenshik sot oryndaýshylary. Spıkerdiń aıtýynsha, robot-sot oryndaýshylarynyń quzyretin keńeıtýge basymdyq berilip otyr.
— Qazir robot-sot oryndaýshy júıesi 20 aılyq eseptik kórsetkishke deıingi óndirip alý isterin qaraıdy. Jarty jylda atalǵan júıe 15 myńnan astam atqarýshylyq isti oryndap, memleket paıdasyna 338 mln teńge óndirdi. Jańa zań kúshine engennen keıin bul shek 40 aılyq eseptik kórsetkishke deıin ulǵaıady, — dedi ol.
Brıfıngte zııatkerlik menshik quqyqtaryn qorǵaý máselesi de sóz boldy. Jyl basynan beri qalada bótenniń taýar tańbasyn zańsyz paıdalanǵan 24 adam ákimshilik jaýapkershilikke tartylyp, olarǵa jalpy somasy 2,7 mln teńgeden asatyn aıyppul salynǵan. Sondaı-aq zańsyz aınalymnan quny 6 mln teńgeden asatyn 2 092 dana kontrafaktilik taýar alynyp, joıylǵan.
Buǵan deıin Shymkentte 29 myńnan astam azamat múlik salyǵyn tólemegenin jazǵan edik.
