Shymkentte alǵashqy qar jaýdy
ShYMKENT. KAZINFORM — Shymkent qalasynda uzaq ýaqytqa sozylǵan nóser men qatty jelden keıin alǵashqy qar jaýdy.
Qalada aýa temperatýrasy 0 gradýsqa deıin kúrt tómendedi. Alaıda qar jamylǵysy áli qalyńdaǵan joq. Aq ulpa tez erip ketti.
Sınoptıkterdiń boljamynsha, 5 qarashada Shymkentte kóshpeli bult shyǵady, túnde qar jaýyp, tuman túsýi múmkin. Soltústik-batystan soǵatyn jel ońtústik-batysqa aýysady, ekpini — 9-14 m/s. Aýa temperatýrasy túnde -11-den -13°C-qa deıin, kúndiz -7-den -9°C-qa deıin tómendeıdi.
— 6 qarashada Shymkentte kóshpeli bult shyǵady, keı jerlerde qar jaýyp, burqasyn, kóktaıǵaq bolady. Ońtústik-batystan soǵatyn jeldiń kúshi — 9-14 m/s. Aýa temperatýrasy túnde -5-ten -7°C-qa deıin, kúndiz -0-den +2°C-qa deıin bolady, — deıdi sınoptıkter.
Polıtsııa qyzmetkerleri júrgizýshilerdi kólikterin daıyndaýǵa, dóńgelekterin, tejegish júıesin, suıyqtyq deńgeıin, qajetti qysqy jabdyqtardyń bolýyn tekserýge shaqyrdy.
— Qalaaralyq baǵyttarda jolaýshylar men júrgizýshilerge jyldamdyqty, qashyqtyqty jáne manevr jasaý erejelerin qatań saqtaý usynylady, — dep atap ótti qalalyq polıtsııa departamenti.
Sondaı-aq tótenshe jaǵdaılar departamentiniń qyzmetkerleri turǵyndarǵa tómen temperatýra jaǵdaıynda gaz jáne jylý jabdyqtaryn qaýipsiz paıdalaný erejelerin saqtaýdyń mańyzdylyǵyn eskertti.
— Temperatýranyń tómendeýine baılanysty Shymkent qalalyq Tótenshe jaǵdaılar departamenti turǵyndardy gaz jáne jylytý jabdyqtaryn paıdalaný jónindegi nusqaýlyqty qatań saqtaýǵa shaqyrady. Turmystyq gazdy nemese peshti durys paıdalanbaý jıi ýlaný men órtke ákep soǵady, — dep tolyqtyrdy vedomstvo.
Aıta keteıik, Almatyda naǵyz kúzgi aýa raıy bastalyp, qalanyń tómengi bóliginde jańbyr, al joǵary jaǵynda alǵashqy qar jaýdy.