Shymkentte alǵash ret uıqybezi qaterli isigine laparoskopııalyq operatsııa jasaldy
ASTANA. KAZINFORM — Shymkent qalalyq kópbeıindi onkologııalyq ortalyǵynda alǵash ret uıqybezdiń qaterli isigi bar patsıentterge laparoskopııalyq pankreatodýodenaldy operatsııa sátti jasaldy. Bul onkohırýrgııadaǵy eń kúrdeli ári joǵary tehnologııalyq hırýrgııalyq aralasýlardyń biri bolyp sanalady. Bul týraly DSM málim etti.
Óńirde jańa ádisti engizý maqsatynda Shymkentke Astana qalasyndaǵy Ulttyq ǵylymı medıtsına ortalyǵynyń tájirıbeli onkohırýrgteri kelip, jergilikti mamandarǵa arnalǵan master-klass ótkizdi.
— Laparoskopııalyq pankreatodýodenaldy operatsııanyń ereksheligi — dástúrli úlken tiliktiń jasalmaýynda. Hırýrgııalyq aralasý arnaıy laparoskopııalyq jabdyqtyń kómegimen birneshe shaǵyn tesý arqyly júzege asyrylady. Mundaı tásil isikti barynsha dál ári qaýipsiz alyp tastaýǵa, operatsııadan keıingi aýyrsynýdy azaıtýǵa jáne patsıentterdiń tezirek saýyǵýyna múmkindik beredi, — delingen habalamada.
Master-klass sheńberinde uıqybezi men oǵan jaqyn ornalasqan aǵzalardyń qaterli isikteri bar úsh patsıentke laparoskopııalyq operatsııa jasaldy.
Mamandardyń aıtýynsha, mundaı tájirıbe almasý jergilikti dárigerlerdiń kásibı biliktiligin arttyrýǵa yqpal etedi jáne aldaǵy ýaqytta Shymkentte kúrdeli joǵary tehnologııalyq operatsııalardy turaqty negizde júrgizýge múmkindik beredi.
Sonyń nátıjesinde qala turǵyndary elimizdiń basqa óńirlerine barmaı-aq joǵary deńgeıdegi mamandandyrylǵan medıtsınalyq kómek ala alady. Bul onkologııalyq kómektiń qoljetimdiligin arttyryp, patsıentterdiń ýaqytyly ári sapaly em alýyna jaǵdaı jasaıdy.
Aıta keteıik, elimizde jyl saıyn 36 myń neırohırýrgııalyq operatsııa jasalady.
