Shymkentte áleýmettik tólemderdi jymqyrý boıynsha is tergelip jatyr

ShYMKENT. KAZINFORM – Qala prokýratýrasy áleýmettik tólemderdiń taǵaıyndalý zańdylyǵyna júrgizgen taldaý nátıjesinde «Ý» esimdi azamatshanyń zańsyz is-áreketin áshkereledi. Bul týraly Shymkent qalasynyń prokýratýrasy málim etti.

— Taldaý barysynda atalǵan azamatsha jeke kásipkerlerdiń elektrondyq tsıfrlyq qoltańba kiltterin paıdalanyp, júkti áıelderdi kásiporyndarǵa jalǵan jumysqa ornalastyrǵany anyqtaldy. Ári qaraı ol júkti áıelderdiń atyna zańsyz túrde áleýmettik tólemderdi rásimdep, belgilengen qarajatty óz qajettiligine jumsaǵan. Zańsyz is-árekettiń saldarynan memleketke 217 mln tg kóleminde shyǵyn kelgen, — dep habarlady prokýratýradan. 

Atalǵan fakti boıynsha QK-tiń 190-baby 4-bóligine sáıkes qylmystyq is tirkelip, Shymkent qalasy boıynsha Ekonomıkalyq tergeý departamentine ári qaraı tergep-tekserý úshin joldandy. Qazirgi ýaqytta istiń mán-jaıyn tolyq anyqtaý maqsatynda tergeý amaldary júrgizilip jatyr.

Eske sala keteıik, buǵan deıin Qazatomónerkásip júıesindegi qarjy jymqyrý isi boıynsha tergeý aıaqtalyp, sotqa ótkenin jazǵan edik.