Shymkentte alaıaqtar bir otbasyǵa 25 mln teńge nesıe alǵyzǵan

ShYMKENT. KAZINFORM – Shymkentte polıtseıler iri kólemde aqsha jymqyrǵan kúdiktilerdi quryqtady, – dep jazdy Polisia.kz.

Qala turǵyny ózin bank qyzmetkerlerimiz dep tanystyrǵan belgisiz tulǵalardyń qońyraýyna aldanyp, polıtsııaǵa júgingen. Alaıaqtar azamatshanyń atyna nesıe rásimdelip jatqanyn aıtyp, senimine kirip, óz nusqaýlaryn oryndaýǵa kóndirgen. Nátıjesinde alaıaqtar jábirlenýshi men onyń jubaıynyń atyna birneshe bankten nesıe rásimdetip, tipti olardyń úıi men avtokóligin tómen baǵamen satýǵa kóndirgen. Keltirilgen jalpy materıaldyq shyǵyn 25 mıllıon teńgeden asty.

Tergeý barysynda jábirlenýshiler qarajattyń bir bóligin alaıaqtardyń nusqaýymen belgisiz shottarǵa aýdarǵany, al qalǵan somany úıine kelgen kýrerge berip jibergeni anyqtaldy. Jedel-izdestirý sharalarynyń nátıjesinde polıtsııa qyzmetkerleri atalǵan qylmysqa qatysy bar tulǵalardy Almaty jáne Shymkent qalalarynda anyqtady.

Qaskóıler urlanǵan qarajatty Shymkenttegi aıyrbastaý pýnkti arqyly Grýzııaǵa aýdarǵan. Polıtseıler eki kúdiktini ustady.

Alaıaqtyq jaıty boıynsha qylmystyq is sotqa joldandy.

Polıtsııa azamattarǵa ózderin bank qyzmetkerimiz dep tanystyrǵan beıtanys adamdardyń qońyraýyna senbeýdi, jeke derekter men qupııa kodtardy eshkimge aıtpaýdy eskertedi.

Kúmán týdyrǵan qońyraýlar túsken jaǵdaıda birden polıtsııaǵa júgingenińiz abzal.

Buǵan deıin ınternet alaıaqqa 32 mln teńge nesıe alyp bergen erli-zaıypty oqıǵasyn aıtyp bergen edi.

Alaıaqtar Qarjy monıtorıngi agenttigi atyn jamylyp aldaýǵa kóshti.