Shymkentte ákimshilik raqymshylyq aıasynda 55 myńnan astam azamattyń aıyppuly keshirildi
ShYMKENT. KAZINFORM – Shymkent qalasynda turǵyndardyń 2 mlrd teńgege jýyq ákimshilik aıyppuly esepten shyǵaryldy.
Shymkentte jeke tulǵalardyń tólenbegen ákimshilik aıyppuldaryna qatysty jarııalanǵan ákimshilik raqymshylyq aıaqtaldy. Raqymshylyq 2026 jylǵy 2 shildedegi jaǵdaı boıynsha ótelmegen ákimshilik aıyppuldarǵa qatysty qoldanyldy.
– Raqymshylyq – izgilik qaǵıdatyna negizdelgen bir rettik shara. Ol azamattardy bolashaqtaǵy quqyq buzýshylyqtar úshin jaýapkershilikten bosatpaıdy. Sonymen qatar zań talaptary sottardyń qaraýyndaǵy quqyq buzýshylyqtarǵa jáne zańnamada naqty kózdelgen ózge de sanattarǵa qoldanylmaıdy, – dep habarlady Shymkent qalasynyń prokýratýrasy.
Nátıjesinde qalada 55 myńnan astam turǵynǵa qatysty 106,9 myń ákimshilik is boıynsha óndirip alý toqtatyldy. Keshirilgen aıyppuldardyń jalpy somasy 1,9 mlrd teńgeden asty.
Vedomstvo málimetinshe, raqymshylyq prokýratýranyń memlekettik organdarmen birlesken jumysy aıasynda júzege asyryldy. Aqparattyq júıelerdiń ıntegratsııasy men memlekettik qyzmetterdiń tsıfrlandyrylýynyń arqasynda barlyq rásimder azamattardyń qatysýynsyz ótkizildi.
Osyǵan baılanysty turǵyndarǵa memlekettik organdarǵa júginý, ótinish berý nemese qosymsha qujat tapsyrý talap etilgen joq.
Shymkent qalasy polıtsııa departamentiniń málimetinshe, raqymshylyq tek qoǵamdyq qaýipsizdikke qater tóndirmeıtin jáne azamattardyń quqyqtary men zańdy múddelerine nuqsan keltirmeıtin jaǵdaılarda ǵana qoldanylady.
– Bul – elimizdegi eń aýqymdy ákimshilik raqymshylyqtardyń biri. Onyń nátıjesinde azamattardyń qarjylyq júktemesi jeńildep, zań talaptarynyń el aýmaǵynda birizdi qoldanylýyna múmkindik jasaldy, – dep málimdedi Shymkent qalasy PD.
Buǵan deıin Jańa Konstıtýtsııaǵa oraı raqymshylyq jarııalanǵany týraly habarlaǵan edik.
