Shymkentte ákimdiktiń 26 qyzmetkeri jazalandy
ShYMKENT. KAZINFORM. Shymkentte ákimdiktiń 26 qyzmetkeri memlekettik satyp alý kezinde zańbuzýshylyqtarǵa jol bergen. Olar jaýapqa tartyldy.
Taldaý barysynda qala prokýratýrasy jergilikti atqarýshy organdardyń sot josyqsyz dep tanyǵan áleýetti ónim berýshilerdi memlekettik satyp alýda bul tizimge engizbeý faktilerin anyqtaǵan. Nátıjesinde bul olarǵa konkýrstarǵa erkin qatysýǵa jáne tapsyrys berýshilermen memlekettik satyp alý týraly kelisimder jasasýǵa múmkindik bergen.
«Prokýrorlyq qadaǵalaý aktisine sáıkes tizilimge 29 josyqsyz ónim berýshi engizildi. Sonymen qatar Shymkent qalasy ákimi apparatynyń 26 qyzmetkeri tártiptik jaýapkershilikke tartyldy»,-dedi Shymkent qalasy prokýratýrasy.
Eske salsaq, biz buǵan deıin Shymkentte Qarataý aýdany ákiminiń orynbasary men qalalyq jolaýshylar kóligi jáne avtomobıl joldary basqarmasy basshysynyń orynbasary jazalanǵanyn jazǵan edik. Olar joldardy, temir jol ótpelerin jáne basqa da jol qurylys jaılaryn kútip-ustaý jónindegi talaptardy oryndamaǵan.
Al oǵan deıin Shymkentte eki basqarmanyń burynǵy basshylary balalardy úıirmesiz qaldyrǵany belgili boldy. Bul faktini de prokýrorlar anyqtap, eks-sheneýnikter jaýapqa tartyldy.
