Shymkentte ákimdiktiń 10 jyl buryn qabyldaǵan zańsyz sheshimi sot arqyly kúshin joıdy

ShYMKENT. KAZINFORM – Zań talaptaryna qaıshy túrde 10 jyldan astam ýaqyt boıy jeke menshikke berilip kelgen jalpyǵa ortaq paıdalanýdaǵy jer telimi memleket menshigine qaıtaryldy. Buǵan Jer kodeksiniń normalary men zańdy kúshine engen sot sheshimi negiz boldy.

Zań buzý deregi Aýyl sharýashylyǵy mınıstrliginiń Jer resýrstaryn basqarý jónindegi qalalyq departamenti júrgizgen jospardan tys tekserý barysynda anyqtalǵan. Tekserý nátıjesinde 2005 jyly ákimdiktiń qaýlysymen jeke tulǵaǵa jer zańnamasynyń talaptaryn buza otyryp, kólemi 0,1 gektar bolatyn jer ýchaskesi berilgeni belgili boldy.

Atalǵan jer telimi jalpyǵa ortaq paıdalanylatyn aımaqta ornalasqan. Soǵan qaramastan oǵan tehnıkalyq qyzmet kórsetý stantsııasyn, saýda ortalyǵyn jáne sulýlyq salonyn salý úshin nysanaly maqsaty belgilengen.

Vedomstvo mundaı sheshimder Jer kodeksine qaıshy keletinin atap ótti.

– Jer kodeksiniń 26-babyna sáıkes, eldimekenderdiń jalpyǵa ortaq paıdalanylatyn aımaqtaryndaǵy jer ýchaskeleri jeke menshikke berilmeıdi, – dep túsindirdi departament ókilderi.

Zańdylyqty qalpyna keltirý maqsatynda is azamattyq ister jónindegi aýdanaralyq sotqa ákimdiktiń qaýlysyn jáne odan keıin jasalǵan barlyq satyp alý-satý sharttaryn jaramsyz dep taný týraly talap-aryzben joldandy.

Birinshi satydaǵy sot memlekettik organnyń ýájderin negizdi dep tanyp, talapty tolyq kólemde qanaǵattandyrdy. Apellıatsııalyq shaǵymdy Shymkent qalalyq sotynyń azamattyq ister jónindegi sot alqasy qarap, ony qanaǵattandyrýsyz qaldyrdy.

Sot sheshimi zańdy kúshine engennen keıin jer telimi memleket menshigine qaıtaryldy.

Budan buryn Shymkentte memleket menshigine ótken 321 jer ýchaskesi úshin 7,5 mlrd teńge tólengenin jazǵan edik. 

Sondaı-aq Shymkentte zańsyz salynǵan qurylystardy buzý jumystary júrgizilip jatqany habarlanǵan bolatyn.