Shymkentte A-2 tas jolynyń bir bóligi bir aıǵa jabylady

ShYMKENT. KAZINFORM – Qaladaǵy A-2 avtomobıl joly qurylys jumystaryna baılanysty jabylatyn boldy. Bul týraly Shymkent qalasynyń ákimdigi habarlady. 

Joldyń jabylatyn bóligi – Jandarbekov kóshesinen bastap Otyrar kóshesi, «Nur» aıaldamasyna deıingi aralyq. Bul ýchaskede kólik qozǵalysy 2025 jylǵy 18 tamyzdan 18 qyrkúıekke deıin, ıaǵnı bir aıǵa toqtatylady.

Avtomagıstral A-2 – Shymkentti aınalyp ótip, Tashkent – Almaty baǵytymen sozylyp jatqan iri jol. Ol qalany Qazaqstannyń basqa óńirlerimen jáne Ózbekstanmen baılanystyrady. Bul trassamen táýligine 15 myńǵa deıin avtokólik, sonyń ishinde úlken kólemdegi tranzıttik júk kólikteri ótedi.

– Ýaqytsha qolaısyzdyqtar úshin keshirim suraımyz. Aınalyp ótý joly syzbada kórsetilgen. Kólik baǵyttaryn aldyn ala josparlańyzdar, - delingen ákimdik habarlamasynda.

Aıta keteıik, budan buryn Shymkentte temirjol ústinen salynyp jatqan jańa kólik ótkeliniń 50%-y daıyn bolǵanyn jazǵan bolatynbyz.