Shymkentte 92 jastaǵy tyl ardageri aýyr hálde jabyq páterden tabyldy
ShYMKENT. KAZINFORM - Oqıǵa týraly habar eriktilerden áleýmettik jeliler arqyly túsken.
Qala ákimdiginiń Jumyspen qamtý jáne áleýmettik qorǵaý basqarmasynyń málimeti boıynsha, oqıǵa Asqar kóshesindegi páterlerdiń birinde bolǵan. 1933 jyly týǵan qart áıel qaraýsyz qalǵan. Kórshileri ol birneshe kún boıy páterden shyqpaı júrgenin, al oǵan buryn kútim jasaǵan ápkesi joq ekenin baıqap, dabyl qaqqan.
– Oqıǵa ornyna áleýmettik beıimdeý ortalyǵynyń mobıldi toby bardy. Mamandar esiktiń ishinen bekitilgenin baıqap, biraq sańylaýdan áıeldiń bólmede jatqanyn kórgen, - dep habarlady basqarma qyzmetkerleri.
Oqıǵa ornyna ýchaskelik polıtseıler, dárigerler jáne Tótenshe jaǵdaı qyzmetkerleri kelgen soń, esik ashyldy.
Zeınetker aýyr jaǵdaıda tabylyp, dereý áleýmettik beıimdeý ortalyǵyna jetkizildi. Onda oǵan alǵashqy medıtsınalyq kómek kórsetildi jáne tamaqtandyryp, gıgıenalyq kútim jáne medıtsınalyq baqylaýǵa alý jumystary uıymdastyryldy.
Qazir atalǵan jaǵdaı boıynsha quzyrly organdar tekserý júrgizip jatyr.
Aıta keteıik, oqıǵa eriktilerdiń kúsh-jigeriniń arqasynda keń kólemde qoǵamdyq rezonansqa ıe boldy. Buryn olar tyl ardageri turatyn páterden vıdeo jarııalaǵan bolatyn.
Kadrlardan sanıtarlyq jaǵdaıdyń nasharlyǵyn kórýge bolady. Belsendilerdiń aıtýynsha, qart áıel buryn qarttar úıinde bolǵan, biraq ony ápkesi alyp ketken. Alaıda ápkesi tıisti kútim jasamaǵan dep boljanyp otyr.
Eske salaıyq, budan buryn Shymkentte júrgizýshi kýáligin zańsyz berýmen aınalysqan top ustalǵanyn jazǵan bolatynbyz.