Shymkentte 9-synyp oqýshysynyń ólimine baılanysty qylmystyq is qozǵaldy
ASTANA. KAZINFORM — Jasóspirim óz úıiniń aýlasyndaǵy saraıda ózine qol jumsaǵan. Onyń denesin jumystan úıine oralǵan anasy taýyp alǵan, dep habarlaıdy Kazinform tilshisi.
Marqum bolǵan 14 jastaǵy balanyń týystarynyń aıtýynsha, qaıǵyly jaǵdaıǵa synyptastary tarapynan jasalǵan býllıng sebep bolǵan. Ol telefonynda tórt synyptasyna arnalǵan hat qaldyrǵan. Onda «Endi sender meni ura almaısyńdar. Endi meni kórmeısińder» dep jazyp, kúdiktilerdiń esimderin kórsetken.
Jaqyndarynyń aıtýynsha, úsh jyl buryn jasóspirimniń ákesi qaıtys bolǵan. Sol ýaqyttan bastap ony kemsitý, qorlaý bastalǵan. Balany mazaqtap, aqsha bopsalap, túrli tapsyrmalar oryndatqan. Al bas tartqan jaǵdaıda uryp-soqqan. Ol uzaq ýaqyt bul týraly eshkimge tis jarmaǵan. Alaıda qaıǵyly oqıǵaǵa az ýaqyt qalǵanda, ol jaǵdaıdy óziniń týys aǵasyna aıtyp, kómek suraǵan.
Jasóspirim oqyǵan №32 orta mekteptiń ákimshiligi oqýshylar arasyndaǵy janjal men aqsha jınaý derekterin joqqa shyǵardy. Ósıet hatta aty atalǵan tórt oqýshy rasymen de marqummen bir synypta oqyǵan.
— Onyń mektepte qorlanǵany týraly bizde esh málimet joq. Oqıǵa aldynda eshqandaı janjal bolmaǵan. Ony eshkim soqqyǵa jyqpaǵan, — dedi mektep dırektorynyń tárbıe isi jónindegi orynbasary Raıhan Túleeva.
Polıtsııa ókilderi kámeletke tolmaǵan balanyń ólimine baılanysty qylmystyq is qozǵalǵanyn habarlady.
— Kámeletke tolmaǵan balanyń ólimine qatysty polıtsııa qylmystyq is qozǵady. Qazir tergeý jumystary júrip jatyr, barlyq mán-jaı anyqtalýda. Tergeý aıaqtalǵannan keıin is boıynsha protsessýaldyq sheshim qabyldanady, — dedi Shymkent qalasy Polıtsııa departamenti.
Marqumnyń týystary kinálilerdiń jazalanýyn talap etip otyr.
Buǵan deıin habarlanǵandaı, Almatyda mektep oqýshysynyń óliminen keıin qylmystyq is qozǵaldy. Áleýmettik jelilerde taraǵan aqparatqa sáıkes, 1 qyrkúıek kúni ol mektep jıynyna beıresmı kıimmen kelgen. Ákimshilik oǵan eskertý jasap, kelesi kúni oqýshyny oqýdan shyǵarǵan. Al 3 qyrkúıekte oqýshy ózine qol jumsaǵan.