Shymkentte 86,3 mln teńge jalaqy qaryzyn óteýde zańbuzýshylyqtar anyqtaldy

ShYMKENT. KAZINFORM — Shymkent qalasynyń prokýratýrasy bankrottyq rásimi júrip jatqan birneshe kásiporyndaǵy zańbuzýshylyqtardy áshkereledi.

Tekserý nátıjesinde 68 jumysker aldynda 86,3 mln teńge jalaqy qaryzy boıynsha kredıtorlyq bereshekti óteý rásiminde birqatar zań talaptary saqtalmaǵan.

Vedomstvonyń málimetinshe, prokýrorlyq qadaǵalaý aktileri negizinde QR ÁQBtK-niń 176-babynyń 1-bóligi boıynsha (550 480 teńge aıyppul) bankrottyq rásimi júrip jatqan zańdy tulǵanyń basshysy ákimshilik jaýapqa tartyldy. Ol menshigindegi «LEXUS LX 570» avtokólikti eki jyldan astam ýaqyttan beri bankrottyqty basqarýshyǵa tabystamaǵan.

— Sondaı-aq 8 avtokólikti satýdy sozbalandyqqa salyp, 22 jumysker aldynda 26,1 mln teńge jalaqy qaryzy boıynsha kredıtorlar talaptaryn oryndamaǵan «Kontı-Stroı» JShS-niń bankrottyqty basqarýshysy QR ÁQBtK-niń 179-babynyń 23-bóligimen (82 572 teńge) ákimshilik jaýapqa tartyldy, — delingen habarlamada.

Sonymen qatar anyqtalǵan zań buzýshylyqtar joıylyp, «ULAN-SERVIS» JShS eki jumysshyǵa 5,4 mln teńge kóleminde jalaqy qaryzyn ótegen.

Budan buryn Shymkentte áleýmettik tólemderdi jymqyrý boıynsha is tergelip jatqanyn jazǵan edik.