Shymkentte 8 jastaǵy qyzǵa azǵyndyq jasaǵan er adam sottaldy
ShYMKENT. KAZINFORM – Shymkentte 8 jastaǵy oqýshy qyzǵa azǵyndyq áreket jasaǵan 56 jastaǵy er adamǵa qatysty jańa úkim shyǵaryldy. Buǵan deıin oǵan osy is boıynsha 50 AEK mólsherinde aıyppul salynǵan edi. Alaıda alǵashqy úkimniń kúshi joıylyp, is qaıta qaralǵannan keıin sottalýshy 7 jyl 6 aıǵa bas bostandyǵynan aıyryldy.
Shymkent qalasynyń kámeletke tolmaǵandardyń isteri jónindegi mamandandyrylǵan aýdanaralyq sotynda QK-niń 124-babynyń 1-bóligi boıynsha aıyptalǵan er adamǵa qatysty qylmystyq is jabyq sot otyrysynda qaraldy.
Іs materıaldaryna sáıkes, 2026 jylǵy 28 sáýirde sottalýshy Shymkenttegi turǵyn úıdiń kireberisinde kámeletke tolmaǵan jábirlenýshige qatysty kúsh qoldanbaı azǵyndyq áreketter jasaǵan.
Sottalýshynyń kinási jábirlenýshi men kýálardyń jaýaptary, zattaı aıǵaqtar jáne is boıynsha jınalǵan ózge de materıaldarmen tolyq dáleldendi.
Prokýror sottalýshyny 8 jylǵa bas bostandyǵynan aıyrý jazasyn taǵaıyndaýdy surady. Sot jazany jeńildetetin mán-jaı retinde onyń II toptaǵy múgedektigin eskerdi.
– Sot N.-ny QK-niń 124-babynyń 1-bóligi boıynsha kináli dep tanyp, oǵan 7 jyl 6 aıǵa bas bostandyǵynan aıyrý jazasyn taǵaıyndady. Sonymen qatar pedagogıkalyq qyzmetpen jáne kámeletke tolmaǵandarmen jumys isteýge baılanysty laýazymdardy atqarý quqyǵynan ómir boıyna aıyrdy, – delingen qalalyq sottyń habarlamasynda.
Jábirlenýshi taraptyń azamattyq talap-aryzy ishinara qanaǵattandyryldy. Sottalǵan azamattan jábirlenýshiniń paıdasyna moraldyq zııandy óteý úshin 3 mln teńge óndirildi.
Sot úkimi zańdy kúshine engen joq.
Buǵan deıin Qyzylordada kámeletke tolmaǵan qyzdy zorlaý isi boıynsha birneshe kúdikti qamaýǵa alynǵanyn habarlaǵan edik.
