Shymkentte 700 myń teńge para alǵan burynǵy basshy 24,5 mln teńge aıyppul tóleıdi

ShYMKENT. KAZINFORM – Sotta burynǵy basshy Eralqasyn Túktibaımen birge eki qyzmetker – zoolog pen zerthana meńgerýshisi de otyrdy. Ekeýi de zeınetkerlik jasynda bolyp, jumys oryndaryn saqtap qalý úshin aqsha bergen.

Úsh aıyptalýshyǵa qatysty is Shymkent qalasynyń qylmystyq ister jónindegi aýdanaralyq sotynda qaraldy.

– Eralqasyn Túktibaı laýazymdy tulǵa retinde birneshe ret iri kólemde para alǵany úshin, al B. jáne Sh. iri kólemde para bergeni úshin aıyptaldy, – dep málimdedi sot.

Sot anyqtaǵandaı, E.Túktibaı «Shymkent obaǵa qarsy kúres stantsııasy» RMM basqarǵan kezde qyzmettik ókilettigin paıdalanyp, qaramaǵyndaǵy qyzmetkerlerden eńbek sharttaryn buzbaý úshin aqsha alǵan. Jalpy para somasy – 700 myń teńge.

Qarajatty eki qyzmetker bergen. Biri – ýaqytsha zoolog, ekinshisi – oba dıagnostıkasy men aldyn alý zerthanasynyń meńgerýshisi. Ekeýi de kelisimshart boıynsha jumys istep, basshynyń sheshimine táýeldi bolǵan.

Biri 200 myń teńge, ekinshisi 500 myń teńge berip, kelisimsharttardy uzartýdy jáne jumysyn saqtaýdy kózdegen.

Sot úkimimen úsh aıyptalýshy da kináli dep tanyldy.

– Jazany taǵaıyndaǵanda sot barlyq aıyptalýshynyń kinásin moıyndaýy men shyn júrekten ókingenin eskerdi. Aýyrlatatyn mán-jaılar anyqtalmady, – dep habarlady sotta.

Eralqasyn Túktibaıǵa 24,5 mln teńge aıyppul salyndy jáne ómir boıyna memlekettik qyzmette laýazym atqarý quqyǵynan aıyryldy.

Al burynǵy qyzmetkerlerge berilgen para somasyna sáıkes, birine – 2 mln teńge, ekinshisine – 5 mln teńge aıyppul salyndy.

Sot úkimi zańdy kúshine endi.

Shymkentte byltyr sybaılas jemqorlyq qylmysy úshin 56 adam sottalǵanyn jazǵan edik.