Shymkentte 7 myńnan astam júk kóligi tekserilip, 300 mln teńge aıyppul salyndy
ShYMKENT. KAZINFORM — Shymkentte júk kólikterine qatysty zań buzýshylyqtar boıynsha 2800-den astam ákimshilik hattama toltyryldy.
Shymkent qalasy boıynsha Kóliktik baqylaý ınspektsııasynyń basshysy Erbol Syrǵabekovtiń aıtýynsha, qalada 560 myńnan astam avtokólik tirkelgen. Onyń 40 915-i — júk kóligi.
Jyl basynan beri ınspektsııa qyzmetkerleri 7,1 myń júk kóligin teksergen.
— Onyń ishinde 4,8 myńy sheteldik, 2,3 myńy otandyq tasymaldaýshylarǵa tıesili. Anyqtalǵan zań buzýshylyqtar boıynsha 2871 ákimshilik hattama toltyrylyp, 300,5 mln teńge kóleminde aıyppul salyndy, — dedi Erbol Syrǵabekov.
Qazir qalada úsh avtomattandyrylǵan ólsheý stantsııasy jumys isteıdi. Olardyń kómegimen 1,8 myńnan astam zań buzýshylyq anyqtalyp, 1245 nusqama berilgen. Aıyppul kólemi — 207 mln teńge. Jyl sońyna deıin qalada taǵy alty avtomattandyrylǵan ólsheý stantsııasyn iske qosý josparlanyp otyr.
Sonymen qatar Shymkentte 14 karerlik kásiporyn bar. Reıdter men tekserýler barysynda osy kásiporyndarǵa qatysty 613 júk kóligi tekserilip, 411 ákimshilik hattama toltyrylǵan. Nátıjesinde 30,7 mln teńge aıyppul salyndy.
Buǵan deıin Qazaqstan-Ózbekstan shekarasynda júk kólikteriniń uzyn-sonar kezegi paıda bolǵanyn jazǵan edik.
