Shymkentte 64 mln teńge jymqyrǵan mektep esepshisi 8 jylǵa sottaldy

ShYMKENT. KAZINFORM - Jalpy bıýdjet salasynda jyl basynan beri 12 qylmystyq is anyqtalyp, olardyń jeteýi sotqa joldanǵan. Al beseýi óndiriste qaralyp jatyr. Bul týraly Shymkent qalasy boıynsha ekonomıkalyq tergep-tekserý departamentiniń uıymdastyrý-baqylaý basqarmasynyń basshysy Dáýren Turǵynbaı málimdedi.

Shymkentte energetıka salasyndaǵy laýazymdy tulǵalar men «Qýatjylýortalyq-3» KMK basshylaryna qatysty sot úkimi shyqty. Kúdiktiler qaladaǵy jylý jelileri men elektr berý jelilerine jóndeý júrgizýge bólingen 1,1 mıllıard teńgeden astam bıýdjet qarajatyn jymqyrǵan. ıAǵnı, qujattyń smetalyq qunyn arttyryp, naqty oryndalmaǵan jumystar úshin aqy tólegen.

– Laýazymdy adamdar urlanǵan qarajatty jylystatý úshin «qolma-qol aqsha jasaýshylar» tobyn tartqan. Olar 7 paıyz mólsherinde aqshalaı syıaqy úshin bógde tulǵalarǵa resimdelgen 24 kúmándi kásiporyn arqyly taýarlardy jetkizý jáne qyzmet kórsetý jónindegi mámileler týraly jalǵan qujattar usynǵan. Paralleldi qarjylyq tergeý sheńberinde qylmystyq jolmen alynǵan qarajatqa satyp alynǵan jyljymaıtyn múlikter anyqtaldy. Atap aıtqanda, Shymkent jáne Astana qalalaryndaǵy 2 páter, 1 turaq orny, Shymkent qalasyndaǵy 3 jeke úı jáne bank shottaryndaǵy 50 mıllıon teńge tárkilendi, - dedi Dáýren Turǵynbaı.

Sot úkimimen barlyq jeti aıyptalýshy 2 jyldan 7,5 jylǵa deıin bas bostandyǵynan aıyryldy. Onyń ishinde energetıka basqarmasynyń laýazymdy tulǵalary, kommýnaldyq kásiporyn basshylary jáne jetkizýshi mekemelerdiń basshylary bar.

Sondaı-aq, bilim salasynda da birneshe qylmystyq is tirkelip, zańdy protsessýaldy sheshimder qabyldanǵan. Onyń ishinde M.Áýezov atyndaǵy Ońtústik Qazaqstan ýnıversıteti de bar. Munda da bıýdjet qarajatyn jymqyrý deregi anyqtalǵan. Qazir sotqa deıingi tergeý júrip jatyr.

Al, qalalyq Bilim basqarmasyna qarasty orta mekteptiń bas esepshisine qatysty qylmystyq is sotqa joldandy. Atap aıtqanda, ol mektep dırektorynyń elektrondi kiltin ıelenip, zańsyz is-áreketterdi iske asyrǵan. Qazynashylyq júıesine qosymsha jalǵan aqparattar engizip, óziniń jáne tanystarynyń eseptik shottaryna bıýdjet qarajattaryn aýdaryp otyrǵan. Jalpy zańsyz aýdarylǵan somma – 64 mln teńge.

– Sot úkimimen bas esepshi QR QK-niń 189 baby 4 bóligimen kináli dep tanylǵan jáne oǵan 8 jyl bas bostandyǵynan aıyrý jazasy taǵaıyndaldy. Al, mektep dırektory elektrondy kiltin bergenine qatysty tártiptik jaýapkershilikke tartyldy, - dedi Dáýren Turǵynbaı.

Aıta keteıik, budan buryn Shymkentte kámeletke tolmaǵandarǵa qarsy jasalǵan qylmystar 34,2 paıyzǵa óskenin jazǵan bolatynbyz.