Shymkentte 6 jastaǵy jetkinshekti azaptap óltirgen týysy 20 jylǵa sottaldy

ShYMKENT. KAZINFORM — Sottalýshy ápkesiniń qyzyn uryp, esinen tandyryp, keıinnen vannadaǵy sýǵa tunshyqtyrǵan.

Shymkent qalasynyń qylmystyq ister jónindegi mamandandyrylǵan aýdanaralyq sotynda QK-niń 99-babynyń 3-bóligimen aıyptalýshyǵa qatysty qylmystyq is qaraldy.

Oqıǵa ótken jyldyń maýsym aıynda Shymkent qalasynda boldy. Aqpan batyr kóshesi boıynda ornalasqan jaldamaly páterde sottalýshy ápkesiniń 2018 jyly týǵan qyzyn azaptap óltirgen. 

Uıqysynan oıanǵan 6 jastaǵy jetkinshektiń aıqaılaı bastaǵanyna ashýlanǵan sottalýshy qyzdyń aıaq-qolyn biriktirip baılap, uryp-soǵyp, edenge qulatqan. Esinen tanyp qalǵan ony vannaǵa sý toltyryp, tunshyqtyryp qasaqana óltirgen.

Sot sheshimimen sottalýshy QK-tiń 99-babynyń 3-bóligimen kináli dep tanyldy. Sondaı-aq, sot 20 jylǵa bas bostandyǵynan aıyrý jazasyn taǵaıyndady. 

— Jazany qylmystyq atqarý júıesiniń qaýipsizdigi ortasha mekemelerinde óteý belgilendi. Úkim zańdy kúshine endi, — delingen Shymkent qalalyq sotynyń baspasóz qyzmeti usynǵan aqparatta.

Aıta keteıik, budan buryn Almatyda Qańtar oqıǵasyna qatysty birneshe aıyptalýshyǵa sot úkimi shyqqanyn jazǵan bolatynbyz.