Shymkentte 6 myńǵa jýyq JRVI jaǵdaıy tirkeldi
ShYMKENT. KAZINFORM – Shymkentte koronavırýs juqtyrǵan eki adam anyqtaldy. Qyrkúıek aıy bastalǵaly qalada birneshe myń adam jiti respıratorlyq vırýstyq ınfektsııa (JRVI) juqtyrǵan.
Qalalyq sanıtarııalyq-epıdemıologııalyq baqylaý departamenti basshysynyń orynbasary Aıgúl Turymbetovanyń aıtýynsha, qyrkúıek aıynda qalada JRVI-diń 5967 jaǵdaıy tirkelgen. Onyń teń jartysy, ıaǵnı 2978-i – 14 jasqa tolmaǵan balalar.
Spıkerdiń sózinshe, jyl basynan beri qalada koronavırýs ınfektsııasynyń 8 jaǵdaıy anyqtalǵan. Onyń ekeýi osy aıda belgili bolǵan.
– Tumaýǵa uqsas aýrýlarǵa qatysty 8 synama zerthanalyq tekserýden ótti. Onyń úsheýinen oń nátıje alyndy. Bir synamadan RS vırýsy shyqty. Sonymen qatar koronavırýs boıynsha eki oń nátıje tirkeldi. Bul aýrýlardyń klınıkalyq kórinisteri óte uqsas. Olardyń naqty túrin tek zerthanalyq zertteý arqyly anyqtaýǵa bolady, – dedi Aıgúl Turymbetova.
Aıta keteıik, jyldyń segiz aıynda qalada JRVI juqtyrǵandar sany 148 myńǵa jýyqtaǵan. Onyń 60 paıyzy – balalar.
Qazirgi tańda qalada maýsymdyq aýrýlardyń aldyn alýǵa baǵyttalǵan vaktsınatsııa naýqany júrgizilip jatyr.
Buǵan deıin BQO-da jiti ishek juqpasymen aýyrǵandar sany 300-den asqanyn habarlaǵan edik.
