Shymkentte 6 adam pırotehnıkadan jaraqat aldy, onyń ekeýi - jasóspirim

ShYMKENT. KAZINFORM – Merekelik demalys kúnderi Shymkent qalasynda jedel medıtsınalyq járdem qyzmeti 9631 shaqyrtýǵa shyqty.

5 kún ishinde qalada jazataıym oqıǵalar men ýlanýlar boıynsha 749 shaqyrtý tirkelgen. Olardyń ishinde 25-i jol-kólik oqıǵasy bolsa, 11 kómirtegi totyǵymen ýlaný jaǵdaıy jáne eki órt, bir gaz jarylysy bar. 6 adam pırotehnıkadan jaraqat alǵan, onyń ekeýi jasóspirim. 

- Bir jaǵdaı boıynsha qolyn jaraqattap alǵan naýqas aýrýhanaǵa ózi baryp, alǵashqy em qabyldaǵan. Al, 5 jaǵdaı boıynsha jaraqat alǵan adamdar jedel járdem kómegimen jetken. Barlyǵyna alǵashqy medıtsınalyq kómek kórsetildi. Aýrýhanaǵa jatqyzý qajettiligi bolmaǵandyqtan, ambýlatorııalyq emdeýmen úılerine jiberildi – dedi Shymkent qalasy densaýlyq saqtaý basqarmasy basshysynyń orynbasary Baqytjan Abdýllaev.

Qala turǵyndaryna sapaly jáne jedel kómek kórsetý maqsatynda statsıonarlyq rezervten alty sanıtarlyq avtokólik alynǵan. Sodan qarbalas ýaqyttarda 26 qosymsha brıgada jumyldyrylǵan. 

- Jalpy 2024 jylǵy 31 jeltoqsannan 2025 jylǵy 4 qańtarǵa deıin Shymkent qalasynda jedel medıtsınalyq járdem qyzmeti 9631 shaqyrtýǵa qyzmet kórsetti. Bul kórsetkish mereke aldyndaǵy kúndermen salystyrǵanda táýligine 150-200 shaqyrtýǵa nemese 9 paıyzǵa tómen,-dedi Baqytjan Abdýllaev.

Aıta keteıik, budan buryn Shymkentte jalǵan qujat jasap, alaıaqtyqpen aınalysqan kúdikti izdestirilip jatqanyn jazǵan bolatynbyz.