Shymkentte 500 megavattyq ekologııalyq gaz jylý stantsııasy salynady
ShYMKENT. KAZINFORM — Qaladaǵy gazdandyrý deńgeıi el boıynsha eń joǵary kórsetkishterdiń biri – 97%, bul 1,1 mln turǵyndy tabıǵı gazben qamtamasyz etýge múmkindik beredi. Bul týraly Energetıka mınıstrliginiń baspasóz qyzmeti habarlady.
Shymkent qalasynda Energetıka vıtse-mınıstri Baqytjan Іlııas qala turǵyndarymen kezdesý ótkizip, onda gaz ınfraqurylymyn damytý, elektr jáne jylýmen jabdyqtaý júıelerin jetildirý, sondaı-aq halyqty munaı ónimderi jáne suıytylǵan munaı gazymen qamtamasyz etý sharalary týraly keńinen baıandady.
Shymkentte energetıkalyq ınfraqurylymdy jańǵyrtý jáne jetildirý jumystary qarqyndy jalǵasyp jatyr. Respýblıkalyq bıýdjet aıasynda jylýmen jabdyqtaý júıesin damytý boıynsha jobalar kózdelgen. Onyń ishinde RK-1 qazandyǵy aýmaǵynda sorǵy stantsııalarynyń ǵımarattaryn salý, K-24 qazandyǵyn jáne ADTs qazandyǵyn jańǵyrtýdy aıaqtaý jumystary bar.
Qaladaǵy gazdandyrý deńgeıi el boıynsha eń joǵary kórsetkishterdiń biri – 97%, bul 1,1 mln turǵyndy tabıǵı gazben qamtamasyz etýge múmkindik beredi. 2024 jyly júzege asqan gazdandyrý jobalarynyń nátıjesinde 80 myńnan astam qala turǵyny tabıǵı gazǵa qol jetkizdi.
2025 jyly «Juldyz», «Jalyn» jáne «Qarabastaý» turǵyn alaptarynda jumystar jalǵasyp jatyr. Jobalar aıaqtalǵan soń 13 myńnan astam adam gazǵa qosylyp, eki jańa turǵyn aýdanǵa gaz beriledi.
Sonymen qatar, Shymkentte qalany jylýmen jáne elektr qýatymen qamtamasyz etý maqsatynda qýaty 500 megavat bolatyn bý-gaz qondyrǵysynyń qurylysy josparlanyp otyr.
Sondaı-aq vıtse-mınıstr «Ońtústik Jaryq Tranzıt» kásipornynyń dıspetcherlik ortalyǵyna baryp, ortalyqtyń táýlik boıǵy jumys tártibimen, jedel basqarý protsesimen jáne tsıfrlandyrý baǵyty boıynsha atqarylyp jatqan jumystarmen tanysty.
Aıta ketelik Atyraý turǵyndarynyń 99,9%-y sý, gaz jáne elektrmen qamtylǵan.