Shymkentte 500-ge jýyq adam bas qosqan AI forýmy ótip jatyr
ShYMKENT. KAZINFORM — Tsıfrlandyrý jáne aqparattyq tehnologııalar qyzmetkerleri kúnine oraı «Kórme» ortalyǵynda «Shymkent AI Forum — 2026» óńirlik forýmy bastaldy.⠀
Aýqymdy jıynnyń negizgi maqsaty — óńirde jasandy ıntellekt pen tsıfrlyq tehnologııalardy ilgeriletý, tyń jobalardy kópshilikke tanystyrý, IT-kompanııalar men startaptar arasyndaǵy áriptestikti arttyrý jáne tehnologııalyq kásipkerlikke serpin berý.⠀
⠀
Forýmǵa memlekettik organdardyń ókilderi, IT salasynyń mamandary, kásipkerler, startap ókilderi, sala sarapshylary, joǵary oqý oryndarynyń oqytýshylary men stýdentteri — barlyǵy 500-ge jýyq adam jınaldy.⠀
⠀
Baǵdarlama aıasynda tsıfrlandyrý men jasandy ıntellekttiń ózekti máselelerin qamtıtyn tórt paneldik otyrys ótedi. Qatysýshylar «Tsıfrlyq Shymkent: syn-qaterler jáne aldaǵy mindetter», «AI dáýirindegi startaptar», «Why MedTech?» jáne «AI & ML. Erteń ne isteımiz?» taqyryptaryn talqylaıdy. Talqylaýlarǵa 14 baıandamashy men 4 moderator qatysady.⠀
⠀
Kórme aımaǵynda tehnologııalyq jobalar keńinen tanystyryldy. Startup Alley alańynda startaptar óz ázirlemelerin usynsa, ózge kompanııalar tehnologııalyq sheshimderin jeke stendterde kórsetip otyr.⠀
⠀
Sonymen qatar qatysýshylar úshin medıtsınalyq tehnologııalar salasyndaǵy jańashyl jobalardy usynǵan 10 komanda synǵa túsetin «MedTech Startup Battle» baıqaýy uıymdastyryldy. Baıqaýdyń júlde qory — 1 mıllıon teńge.⠀
⠀
Forým aıasynda robototehnıkaǵa arnalǵan Robo Zone men Game Zone ınteraktıvti alańdary da jumys isteıdi. Munda kelýshiler zamanaýı tehnologııalarmen jáne jańa tsıfrlyq sheshimdermen tájirıbe júzinde tanysa alady.⠀
⠀
«Shymkent AI Forum — 2026» — memlekettik sektordy, IT-bıznesti, joǵary oqý oryndaryn jáne startap-qaýymdastyqty toǵystyrǵan mańyzdy tehnologııalyq alań. Forým qorytyndysy óńirdiń tsıfrlyq jáne ınnovatsııalyq áleýetin arttyrýǵa, tehnologııalyq jobalardy damytýǵa jáne sala ókilderi arasyndaǵy áriptestikti keńeıtýge jańa múmkindikter ashady dep kútiledi.