Shymkentte 500 adam júrgizýshi kýáligin zańsyz alǵan

ASTANA. KAZINFORM — Shymkentte júrgizýshi kýálikterin zańsyz berý shemasy áshkerelendi, dep habarlaıdy qalalyq prokýratýranyń baspasóz qyzmeti.

Qala prokýratýrasynyń úılestirýimen Shymkent qalasy boıynsha Qarjy monıtorıngi agenttiginiń departamenti júrgizýshi kýálikterin zańsyz rásimdeýmen aınalysqan uıymdasqan qylmystyq toptyń jolyn kesti.

2023–2024 jyldary «Azamattarǵa arnalǵan úkimet» KEAQ-nyń № 2 mamandandyrylǵan HQKO basshylyǵy men qyzmetkerleri teorııalyq jáne praktıkalyq emtıhandarsyz júrgizýshi kýálikterin rásimdeýge jaǵdaı jasaǵan.

— Mundaı «qyzmettiń» quny 150 myńnan 400 myń teńgege deıin jetken. Nátıjesinde keminde 500 adam júrgizýshi kýáligin zańsyz alǵan. Qylmystyq toptyń tabysy 150 mıllıon teńgeden asqan.  Tergeý barysynda kúdiktilerdiń 200 mıllıon teńgeden astam múlkine tyıym salyndy. Іs boıynsha 15 tulǵa aıyptalýshy dep tanylǵan. Tergeý aıaqtalyp, materıaldar sotqa joldandy, — delingen Shymkent qalasy prokýratýrasy taratqan habarlamada.

Buǵan deıin elorda soty aqparattyq júıege jalǵan málimetter engizip, aýqymdy qarjylaı zalal keltirgen Halyqqa qyzmet kórsetý ortalyǵynyń burynǵy qyzmetkerine úkim shyǵardy.