Shymkentte 5 adamnyń gazdan ýlanýyna qatysty jańa derekter aıtyldy
Shymkentte 5 adamnyń gazdan ýlanýyna qatysty jańa derekter aıtyldy, dep habarlaıdy Kazinform.
Búgin saǵat 12:10 shamasynda Shymkent qalasy Tótenshe jaǵdaılar departamentiniń daǵdarys jaǵdaılar basqarmasyna Orda kóshesinde ornalasqan jeke turǵyn úıde tabıǵı gazdan ýlany belgilerimen 5 adamnyń máıiti tabylǵany jóninde habarlama kelip túsken.
Qutqarýshylar oqıǵa ornyna jetkende úıdiń dálizinde ornalasqan gaz qondyrǵysynyń janǵysh bólikterinen janý belgileri anyqtalǵan. Sonymen qatar úıde tabıǵı gazdyń ıisi shyqqan. Sondaı-aq, murjanyń jáne jylytý qazandyǵynyń betki qaqpaq jabyndysy bolmaǵan. Gaz qubyry avtomatıkaǵa jalǵanbaı, tikeleı qosylǵandyǵy belgili bolǵan.
«5 adam kómirqyshqyl gazymen ýlandy degen boljam bar. Bıylǵy jyldyń shilde aıynda da atalǵan úı gaz jabdyqtaryn durys paıdalanbaǵany úshin anyqtalǵan kemshilikterge baılanysty tabıǵı gazdan ajyrtylǵan bolatyn. Búgingi tańda sot medıtsınalyq ekspertızasy taǵaıyndaldy. Nátıjesi shyqqan soń habarlaıtyn bolamyz», - dedi «Qaztransgaz aımaq» AQ ókili Eldar Qýandykov.
