Shymkentte 47 ólshemdi aıaq kıim kıetin sarbaz boryshyn ótep júr
ShYMKENT. KAZINFORM – Shymkent qalasyndaǵy QR ІІM Ulttyq ulanynyń 6506 áskerı bóliminde boıy eki metrge jýyq, 47 ólshemdi aıaq kıim kıetin qatardaǵy jaýynger Denıs Mýhın qyzmet etedi.
19 jastaǵy sarbaz Almaty oblysynan merzimdi áskerı qyzmetke shaqyrylǵan. Ol áskerge deıin Talǵar polıtehnıkalyq kolledjin «avtoelektrık» mamandyǵy boıynsha támamdaǵan.
Denıs bala kezinen voleıbolmen aınalysqan. Toǵyzynshy synypta-aq 45 ólshemdi aıaq kıim kıgen. Sarbazdyń aıtýynsha, boıy men aıaq kıim ólsheminiń úlken bolýy ákesinen daryǵan.
Áskerı qyzmetiniń alǵashqy kúnderinen-aq oǵan qajetti kıim-keshek pen aıaq kıimdi tańdaý máselesi týyndaǵan. Oqý pýnktinde ózine shaq aıaq kıim tabylǵansha, oǵan áskerı bólim bergen krossovkany kıip júrýge týra kelgen.
Kóp uzamaı áskerı bólim qyzmetkerleri Denıske 47 ólshemdi aıaq kıim taýyp bergen. Sodan beri úlken ólshemdi aıaq kıimi qarýlastarynyń arasynda ony birden tanýǵa múmkindik beretin belgilerdiń birine aınalǵan.
– Shymkent qalasynda kezekshilik atqaryp júrgende adamdar meniń boıyma da, aıaq kıimime de tańǵalyp jatady. Áskerge alǵash kelgende aıaǵyma shaq aıaq kıim tabý ońaı bolǵan joq. Keıin arnaıy aıaq kıim aldyrdy. Osy jaǵdaıdyń ózi qyzyq oqıǵaǵa aınaldy. Áskerge de tez úırenisip, bárimen til tabysyp kettim, – deıdi Denıs Mýhın.
Qazir ol qala kóshelerinde kún saıyn patrýldik qyzmet atqaryp, turǵyndar men qonaqtardyń qaýipsizdigin qamtamasyz etýge úles qosyp júr.
Denıs boıymen ǵana emes, memlekettik tildi jetik bilýimen de kózge túsedi. Ol kúndelikti qyzmet barysynda qazaq tilinde erkin sóılesedi.
Al qarýlastary boıshań sarbazdy ázildep «Gýllıver» dep atap ketken.
Buǵan deıin Aqtóbedegi áskerı bólimde bir synypta oqyǵan 6 jigit Otan aldyndaǵy boryshyn ótep júrgenin jazǵan edik.
