Shymkentte 4 myńnan astam adamdy aldap soqqan qarjy pıramıdasy anyqtaldy

ASTANA. KAZINFORM – Qarjylyq monıtorıng agenttigi Shymkent qalasy boıynsha departamenti «Nazira Gold» qarjy pıramıdasynyń qyzmetin toqtatty.

Ózderin zergerlik buıymdar satýmen aınalysatyn kompanııa retinde tanystyrǵan kúdiktiler salymshylarǵa salǵan somalarynan 20-40% kóleminde aı saıynǵy tabys tabýǵa ýáde bergen. Al, shyn máninde tólemder satýdan túsken paıdadan emes, jańa qatysýshylardyń salymdarynan júzege asyrylǵan.

- Nátıjesinde qarjy pıramıdasyna 4 myńnan astam salymshy tartylǵan. Qylmystyq tabysqa kúdiktiler eki páter, turǵyn úı jáne 10 avtokólik satyp alǵan. Tintý barysynda 374 mıllıon teńge qolma-qol aqsha jáne quny 300 mıllıon teńgeden astam 12 kg altyn buıymdar tárkilengen, - dep jazdy departamentten.

Kúdiktiler eki aıǵa qamaýǵa alyndy.

Sotqa deıingi tergeý jalǵasýda.

Qylmystyq is júrgizý kodeksiniń 201-babyna sáıkes, basqa aqparat jarııalaýǵa jatpaıdy.

Aıta keteıik, Agenttikte qarjy pıramıdalarynyń belgilerin tekserýge múmkindik beretin «Baiqa, piramida!» Telegram-boty jumys istep tur. 

- Eger siz nemese jaqyndaryńyz qarjy pıramıdasynyń áreketine tap bolsa, turǵylyqty jerińiz boıynsha Ekonomıkalyq tergep-tekserý departamentine júginýdi suraımyz. Azamattardy saq bolýǵa jáne kúmándi qarjylyq uıymdarǵa jınaqtaryn salmaýǵa shaqyramyz, - delingen aqparatta.

Buǵan deıin «Asar Baspana» qarjy pıramıdasy 86 myńnan astam azamattan 12,4 mlrd teńge tartqan.