Shymkentte 35 mln teńgeden astam somanyń kontrafaktilik ónimi anyqtaldy

ShYMKENT. KAZINFORM — Shymkentte kontrafaktilik ónimder sany aldyńǵy jyldarmen salystyrǵanda aıtarlyqtaı ósken. 

Qalalyq ádilet departamentiniń basshysy Aınur Isabekovanyń aıtýynsha, 2025 jyly Shymkentte taýar tańbalaryn zańsyz paıdalanýǵa qatysty quqyq ıeleriniń aryzdary negizinde tekserý júrgizilip, 50 ákimshilik is qozǵalǵan. Sot sheshimimen kináli tulǵalarǵa 5 mln 600 myń teńgeden asa kólemde aıyppul salyndy.

— Ótken jyly qalada zańsyz aınalymnan jalpy quny 35 943 862 teńge kólemindegi 58 062 dana kontrafaktilik ónim alynyp tastaldy. Bul kórsetkish aldyńǵy jyldarmen salystyrǵanda edáýir artqan. Jalǵan taýarlardyń basym bóligi turmystyq hımııa men taǵam ónimderi sanatyna jatady. Osyǵan baılanysty tutynýshylardy kúndelikti qoldanatyn taýarlardy satyp alý kezinde asa muqııat bolýǵa shaqyramyz, — dedi ol.

Onyń sózinshe, bıylǵy ózgerister aıasynda kásipkerlerdi qoldaý maqsatynda taýar belgisin tirkeý tártibi jeńildetilgen. Buryn 7 aıǵa deıin sozylatyn tirkeý merzimi endi aqyly jedel qyzmet arqyly 4 aıǵa deıin qysqartyldy. Al taýar belgisine qatysty shaǵym berý ýaqyty 1 aıdan 2 aıǵa uzartyldy.

Budan buryn Shymkentte jalǵan lımonad satqan turǵyn ustalǵanyn jazǵan edik.