Shymkentte 35 jetkizýshi uıym áleýmettik qyzmetter portalynan shyǵaryldy
ShYMKENT. KAZINFORM – Monıtorıng barysynda birqatar merdigerdiń qyzmeti belgilengen talaptarǵa saı kelmeıtini anyqtaldy.
Áleýmettik qyzmetter portaly 2021 jyldan bastap respýblıka kóleminde engizilgen. Bul platforma múgedektigi bar azamattarǵa tehnıkalyq quraldar men ońaltý qyzmetterine onlaın túrde, mekemelerge barmaı-aq tapsyrys berýge, sondaı-aq jetkizýshini óz betinshe tańdaýǵa múmkindik beredi.
Qazirgi tańda respýblıka boıynsha portalda 2 117 merdiger tirkelse, onyń 59-y Shymkent qalasynyń úlesinde. Olardyń qatarynda 31 tehnıkalyq ońaltý quraldaryn jetkizýshi, 22 ymdaý tili mamany men jeke kómekshi qyzmetin usynýshy, sondaı-aq 6 shıpajaılyq-kýrorttyq emdeý qyzmetin kórsetetin uıym bar.
Qalalyq jumyspen qamtý jáne áleýmettik qorǵaý basqarmasynyń basshysy Janat Ýtebaevanyń aıtýynsha, ótken jyly portal arqyly kórsetiletin qyzmetterdiń sapasyn qamtamasyz etý jáne azamattardyń quqyqtaryn qorǵaý maqsatynda monıtorıng júrgizilgen.
– Nátıjesinde shart talaptaryn buzǵan 35 jetkizýshi portaldan shyǵaryldy, 3 merdiger óz erkimen qyzmet kórsetýden bas tartty. Monıtorıng barysynda 90 azamatqa ótinim berý tártibi, qyzmetti tańdaý múmkindigi men quqyqtary boıynsha túsindirý jumystary júrgizildi. Sonymen qatar sot sheshimine sáıkes áreketke qabiletsiz dep tanylǵan azamattarǵa qatysty ońaltýdyń jeke baǵdarlamalaryn qaıta qaraý úshin usynystar engizildi, – dedi ol.
Spıkerdiń sózinshe, birqatar merdigerdiń qyzmeti belgilengen talaptardy saqtamaǵany anyqtalǵan. Atap aıtqanda «Istok aýdıo», «Erden ınva», «Manas ınva», «Baıtas ınva» uıymdarynyń usynǵan taýarlary belgilengen klassıfıkator talaptaryna saı kelmegen. Osyǵan baılanysty tıisti materıaldar sotqa joldanyp, jaýapty organdar men ýákiletti mınıstrlikke resmı hat jiberilgen.
Sondaı-aq 40 azamatty shıpajaılyq-kýrorttyq emdeýden jáne 18 azamatty jeke kómekshi qyzmetinen alyp tastaý boıynsha salalyq departamentke usynystar joldanǵan.
Resmı málimetke sáıkes, búginde qala boıynsha 43 myńnan astam múgedektigi bar adam tirkelgen.
Vedomstvo málimetinshe, protezdik-ortopedııalyq quraldarǵa 4 288 ótinish qabyldanyp, 1 507 azamat qajetti quraldarmen qamtylǵan. Al sýrdo, tıflo jáne gıgıenalyq quraldar boıynsha 11 083 ótinishtiń 8 658-i qanaǵattandyrylǵan. Múgedekterge arnalǵan qolarbalar boıynsha 427 ótinish túsip, 343 azamat qajetti qural alǵan.
Budan buryn áleýmettik qyzmetter portaly arqyly 48 myńnan astam qyzmet kórsetilgenin jazǵan edik.
