Shymkentte 35 jas sarbaz áskerı boryshyn óteýge attandy
ShYMKENT. KAZINFORM — Respýblıkalyq mańyzy bar qalanyń jınaqtaý pýnktinde 35 bozbalany áskerı boryshyn óteýge saltanatty jaǵdaıda shyǵaryp saldy.
Olar jas jaýynger kýrsynan ótken soń Qonaev garnızonyndaǵy Desanttyq-shabýyldaý áskerleriniń áskerı bóliminde qyzmet etetin bolady.
Іs-sharaǵa qalalyq qorǵanys isteri jónindegi departament bastyǵy polkovnık Ábdiǵabıt Shegebaev, qurmetti qonaqtar, ardagerler uıymdarynyń tóraǵalary, sondaı-aq sarbazdardyń ata-analary men týǵan-týystary qatysty.
— Babalarymyz ulan-ǵaıyr qazaq dalasyn qasyq qany qalǵansha qorǵap, bizge amanat etti. Qarý asynyp, sapqa turyp, áskerı boryshyn óteý — árbir er azamat úshin úlken abyroı. Biz sizderdiń osy qurmetti mindetti laıyqty oryndaıtyndaryńyzǵa senemiz. Qyzmetin úzdik atqarǵan sarbazdar áskerden keıin tegin joǵary bilim alýǵa nemese áskerı qyzmetti jalǵastyrýǵa múmkindik alady, — dedi polkovnık Ábdiǵabıt Shegebaev.
Al Desanttyq-shabýyldaý áskerleri áskerı bólimi komandıriniń tárbıe jáne ıdeologııalyq jumystar jónindegi orynbasary kapıtan Madııar Raıymberdıevtiń aıtýynsha, sarbazdar áskerı qyzmet barysynda brondy transporter kózdeýshisi, oqshasharshy, granata atqysh, atqysh, mergen syndy áskerı-eseptik mamandyqtardy meńgeredi.
— Jaýyngerlik daıyndyq baǵdarlamasyna sáıkes, ár sarbaz bir jyldyń ishinde eki ret parashıýtpen sekiredi, — dedi ol.
Bolashaq desantshylardy garnızonnyń áskerı orkestri shyǵaryp saldy. Otan qorǵaýshylardy qoldaýǵa «Jas sarbaz» jasóspirimder qozǵalysynyń tárbıelenýshileri, áskerı-patrıottyq klýbtardyń músheleri men Qorǵanys mınıstrligine qarasty Sabyr Raqymov atyndaǵy áskerı kolledjdiń kýrsanttary da keldi. Olar Oqýshylar saraıynyń shyǵarmashylyq ujymdarymen birge kontserttik baǵdarlama daıyndap ákelipti.
Kúzgi shaqyrylym naýqany aıasynda aldymen UQK Shekara qyzmetiniń, Memlekettik kúzet qyzmetiniń bólimsheleri, sodan keıin Qarýly kúshterdiń, Tótenshe jaǵdaılar mınıstrligi men Ulttyq ulannyń áskerı bólimderi jasaqtalatynyn aıta ketý kerek.
Kúzgi shaqyrylym boıynsha qazirgi tańda Shymkent qalasynan UQK Shekara qyzmetine 170 sarbaz jóneltildi. 1 jeltoqsanǵa deıin Qarýly kúshter qataryna taǵy 850 jasty shaqyrý josparlanyp otyr.
Aıta ketelik áskerı qyzmetshilerge qoldaý kórsetetin AI-sulu Telegram-boty iske qosyldy.