Shymkentte 35 myń adamǵa arnalǵan stadıon qurylysy nege kesheýildedi

ShYMKENT. KAZINFORM — Jańa stadıon qurylysy 2026 jyly aıaqtalady dep josparlanǵan, arada eki jylǵa jýyq ýaqyt ótse de, joba tolyq qarqyn ala qoıǵan joq.

2024 jyly maýsym aıynda Shymkentte 35 myń adamǵa arnalǵan elimizdegi eń úlken stadıonnyń irgetasy qalanǵan bolatyn. Oǵan qala ákimi Ǵabıt Syzdyqbekov pen birqatar fýtbolshy qatysty. Qala ákimdigi nysan qurylysyn 2026 jyly aıaqtaýdy josparlap otyrǵanyn habarlaǵan edi. 

Alaıda sodan bergi eki jylǵa jýyq ýaqyt ishinde qurylys jumystary keshigip bastalǵany belgili boldy. Bul týraly qala ákimdigi Kazinform tilshisiniń resmı saýalyna bergen jaýabynda habarlady.

— Jańa stadıon qurylysyn júrgizý úshin 20,9 ga jer telimi zańdastyrylǵan bolatyn. Alaıda stadıon qurylysyn jobalaý barysynda qosymsha 6,24 ga jer telimine qajettilik týyndady. Osyǵan baılanysty atalǵan jer telimin memleket muqtajdyǵyna alý jumystary birshama ýaqytty talap etkendikten qurylys jumystary josparlanǵan merziminen keıin bastaldy, — delingen qala ákimdigi usynǵan aqparatta.

Vedomstvo málimetinshe, qazirgi tańda qurylys aýmaǵynda burandaly qadalardy qaǵý jumystary júrgizilip jatyr.

— Stadıon qurylysy jergilikti bıýdjet esebinen qarjylandyrylady. Qazir jobalaý-smetalyq qujattama ázirlenip jatyr. Merdiger retinde «Qazaq Stroy» JShS anyqtaldy. Qurylys-montajdaý jumystaryna qajetti naqty qarjy kólemi jobalaý-smetalyq qujattama memlekettik saraptamadan ótkennen keıin belgili bolady, — dep málimdedi qala ákimdigi.

Budan buryn Almatyda aldaǵy jyldary 45 myń kórermendi bir mezette qabyldaı alatyn jańa fýtbol stadıony salynatynyn jazǵan edik.