Shymkentte 31 jastaǵy áıel úshem bosanyp, 7 balanyń anasy atandy
ShYMKENT. KAZINFORM – Shymkent qalalyq №2 aýrýhanasynyń perzenthanasynda úshem dúnıege keldi.
Qalalyq densaýlyq saqtaý basqarmasynyń málimetinshe, 1995 jyly týǵan Gúlbaǵıra Ótemisqyzy júktiliktiń 31-aptasynda dárigerlerdiń kómegimen úshemdi aman-esen ómirge ákeldi.
Merziminen buryn týǵan sábıler alǵashqy úsh táýlik boıy jańa týǵan nárestelerdiń reanımatsııa jáne qarqyndy terapııa bóliminde dárigerlerdiń turaqty baqylaýynda boldy.
Qyz balaǵa Aıym, al ul balalarǵa Nurasyl, Bekasyl degen esim qoıyldy.
– Nárestelerge tynys alý qoldaýy kórsetilip, ómirlik mańyzdy kórsetkishteri táýlik boıy qadaǵalandy. Keıin olardyń jaǵdaıy turaqtalǵan soń, jańa týǵan náresteler patologııasy bólimine aýystyrylyp, em-dom men arnaıy kútim jalǵasty, - delingen habarlamada.
6 qańtar kúni dúnıege kelgen úshemder salmaq qosyp, árqaısysy 2 300 gramǵa deıin jetken.
Dárigerler úshemderdiń damýy turaqty ekenin atap ótti. Qazirgi ýaqytta anasy men nárestelerdiń jaǵdaıy qalypty. Ýaqtyly kórsetilgen medıtsınalyq kómektiń nátıjesinde sábıler ómirge sátti beıimdelip keledi.
Aıta keteıik, úshemderdi úıinde tórt baýyry asyǵa kútip otyr. Anasy dekrettik demalysta bolsa, ákesi qurylys salasynda eńbek etedi.
Budan buryn Shymkentte Habıba, Halıma jáne Hamıda esimdi úshem dúnıege kelgenin habarlaǵan edik.