Shymkentte 3 jasar bala tórtinshi qabattan qulap ketti

Shymkentte úsh jasar bala 4-qabattan qulap ketti, dep habarlaıdy QazAqparat tilshisi.

Oqıǵa Saıram shaǵyn aýdanynda boldy.

Ata-anasynyń qaraýynsyz qalǵan 2020 jyly týǵan búldirshin 4-shi qabattan qulap túsken.

Qazir ol Shymkent qalasyndaǵy oblystyq klınıkalyq balalar aýrýhanasyna jatqyzyldy. Jaǵdaıy aýyr.

Oǵan mıdyń shaıqalýy, jilinshiktiń jabyq synýy, ishtiń doǵal jaraqaty dıagnozy qoıylyp otyr.

«Aldyn ala boljam boıynsha, bala moskıt toryna súıenip, sonymen birge qulap ketken. Osy ýaqytta anasy basqa bólmede bolǵan. Qurmetti ata-analar! Balalaryńyzdy qaraýsyz qaldyrmańyzdar» - delingen Shymkent qalasy TJD qoǵammen baılanys toby taratqan aqparatta.

Aıta keteıik, jyl basynan beri Shymkentte balalardyń terezeden qulaýynyń 7 faktisi tirkeldi. Úsh búldirshin qaıtys bolsa, tórteýi jaraqat alǵan. 

Bárinde sábıler ata-anasynyń qaraýynsyz qalǵan.