Shymkentte 3 mln teńge júlde qory bar halyqaralyq IT dodasy ótedi
ASTANA. KAZINFORM — Digital Qazaqstan 2026 forýmy aıasynda Shymkent qalasynda óńirdegi eń iri IT is-sharalardyń biri — Central Asia Programming Championship 2026 halyqaralyq sporttyq baǵdarlamalaý chempıonaty ótedi.
Bul doda Ortalyq Azııanyń daryndy baǵdarlamashylaryn bir alańǵa jınaıdy.
Baıqaýǵa Qazaqstan, Qyrǵyzstan, Ózbekstan, Tájikstan jáne Túrikmenstan elderinen 20 jastan asqan qatysýshylar qatysady. Onlaın irikteý kezeńi 28 aqpanda ótedi, al fınal 2026 jylǵy 27 naýryzda Shymkentte oflaın formatta uıymdastyrylady.
Jalpy júlde qory — 3 mln teńge: birinshi orynǵa — 1,5 mln teńge, ekinshi orynǵa — 1 mln teńge, úshinshi orynǵa — 500 myń teńge beriledi.
Jarys jeke formatta ótedi. Bul ár qatysýshyǵa halyqaralyq deńgeıdegi ICPC stılindegi algorıtmdik tapsyrmalar arqyly óz bilimin, logıkalyq jáne taldaý qabiletin kórsetýge múmkindik beredi. Fınalǵa ár elden úzdik úsh qatysýshy joldama alady. Buǵan qosa, ulttyq kvotaǵa enbegen, biraq joǵary nátıje kórsetken taǵy 25 qatysýshy fınalǵa ótedi. Osylaısha sheshýshi kezeńde óńirdiń eń myqty baǵdarlamashylary baq synaıdy.
— Qazaqstan tsıfrlandyrý men jasandy ıntellektti damytýǵa basymdyq berip otyrǵan kezeńde mundaı bastamalardyń mańyzy arta túsedi. Central Asia Programming Championship jaı ǵana jarys emes, jańa ınjenerlik ortany qalyptastyratyn, óńirlik yntymaqtastyqty nyǵaıtatyn jáne Ortalyq Azııanyń IT-talanttarynyń áleýetin ashýǵa múmkindik beretin naqty alań. Biz myqty ázirleýshilerge halyqaralyq sarapshylarmen tikeleı baılanys ornatýǵa, jahandyq tehnologııalyq jobalarǵa qatysýǵa jáne kásibı turǵyda ósýge jaǵdaı jasaýdy mańyzdy dep sanaımyz, — dep atap ótti Premer-mınıstrdiń orynbasary — tsıfrlyq damý jáne jasandy ıntellekt mınıstri Jaslan Madıev.
Chempıonatqa qatysý tegin. Fınalısterdiń jol shyǵynyna 100 000 teńgege deıingi qarajat jáne turý shyǵyndaryn uıymdastyrýshylar óteıdi.
— Biz úshin bul chempıonat tek jarys qana emes, óńirdegi myqty tehnologııalyq qaýymdastyqty biriktiretin alańǵa aınalýy tıis. Daryndy ázirleýshiler óz múmkindigin kórsetip, halyqaralyq sarapshylardan keri baılanys alyp, ındýstrııa ókilderimen tikeleı baılanys ornata alady. Central Asia Programming Championship — Ortalyq Azııadaǵy jańa býyn ınjenerlerin damytýǵa qosylǵan úles, — dedi Alem.ai Foundation dırektory Adına Magavına.
Uıymdastyrýshylardyń aıtýynsha, chempıonatqa qatysý tek aqshalaı júldemen shektelmeıdi. Qatysýshylar kúrdeli algorıtmdik tapsyrmalar arqyly óz deńgeıin synap, óńirlik jáne halyqaralyq IT-kompanııalardyń nazaryn aýdara alady, kásibı baılanystaryn keńeıtip, seriktes kompanııalardan jumys usynysyn alý múmkindigine ıe bolady.
Chempıonatty Alem.ai Foundation, Qazaqstannyń sporttyq baǵdarlamalaý federatsııasy jáne Astana Hub uıymdastyrady. Іs-shara Higgsfield.ai jáne AGI Lab qoldaýymen ótedi.
Aıta ketelik Almatyda alǵash ret álemdegi eń iri IT-kórmelerdiń biri ótetini týraly jazǵan edik.