Shymkentte 29 myńnan astam azamat múlik salyǵyn tólemegen
ShYMKENT. KAZINFORM – Shymkentte múlik salyǵy boıynsha bereshek kólemi 230 mln teńgege jetti. Qaryzyn ótemegenderdiń sany 29 myńnan asty.
Bul týraly Shymkent qalasy boıynsha Memlekettik kirister departamentiniń bólim basshysy Shoqan Omarbek málim etti.
– Bereshegi 1 AEK-ten asatyn boryshkerlerdiń materıaldary jeke sot oryndaýshylaryna joldanady. Odan ári olar májbúrlep óndirip alý sharalaryn qoldanady. Boryshkerlerdiń bank shottary buǵattalyp, múlkine shekteý qoıylady. Al bereshek kólemi 40 AEK-ten asqan jaǵdaıda shetelge shyǵýǵa tyıym salynady, – dedi ol.
Spıkerdiń aıtýynsha, múlik salyǵy turǵyn úıdiń baǵalaý quny negizinde esepteledi. Baǵalaý qunyna nysannyń ornalasqan jeri, salynǵan jyly, qurylys materıaly, kólemi jáne amortızatsııalyq tozýy áser etedi.
– Qurylys materıalynyń quny joǵary ári úıdiń kólemi úlken bolǵan saıyn onyń baǵalaý quny da arta túsedi, – dedi Shoqan Omarbek.
Sondaı-aq ol bıyldan bastap páterin jalǵa beretin azamattar úshin salyq salý tártibi jeńildetilgenin atap ótti.
– Eger aı saıynǵy tabysy 1,3 mln teńgeden aspasa, azamattar jeke kásipker retinde tirkelmeı-aq, Kaspi.kz nemese E-Salyq Business mobıldi qosymshalary arqyly ózin-ózi jumyspen qamtyǵandar rejımine tirkele alady. Bul rejım boıynsha salyq eseptiligin tapsyrý jáne jeke tabys salyǵyn tóleý talap etilmeıdi. Tek tabystyń 4 paıyzy mólsherinde áleýmettik tólemder aýdarylsa jetkilikti, – dedi bólim basshysy.
Buǵan deıin habarlaǵanymyzdaı, Shymkent qalasynda kólik salyǵy boıynsha bereshegi 250 AEK-ten asatyn 44 tulǵaǵa qatysty júrgizýshi kýáliginen aıyrý sharalaryn qoldaný úshin sot organdaryna usynys joldandy.
