Shymkentte 26-27 naýryzda birqatar jolda kólik qozǵalysy shekteledi
ShYMKENT. KAZINFORM — Aldaǵy eki kúnde Shymkent qalasy Eýrazııalyq úkimetaralyq keńestiń otyrysy ótetin jáne tsıfrlyq kún tártibi boıynsha mańyzdy máseleler talqylanatyn basty alańǵa aınalady. Qalada halyqaralyq kezdesýlerdiń tyǵyz kestesi josparlanǵan.
26-27 naýryz kúnderi saǵat 11:00–den bastap Shymkentte Temirlan tasjoly, Jeltoqsan kóshesi, Qonaev jáne Báıdibek bı dańǵyldarynyń bir jaǵy jabylyp, kólik qozǵalysy shekteledi.
— Ýaqytsha qolaısyzdyqqa túsinistik tanytyp, jol júrý baǵytyn aldyn ala josparlaýdy suraımyz, — dep habarlady qalalyq jolaýshylar kóligi jáne avtomobıl joldary basqarmasy.
Eýrazııalyq úkimetaralyq keńestiń otyrysyna jáne «Digital Qazaqstan — 2026» halyqaralyq forýmyna Qazaqstan, Reseı, Belarýs jáne Qyrǵyzstan úkimet basshylary, Armenııanyń vıtse-premeri, sondaı-aq Eýrazııalyq ekonomıkalyq komıssııa alqasynyń tóraǵasy qatysady.
Sonymen qatar, EAEO janyndaǵy baqylaýshy memleketterdiń ókilderi de qatysady dep josparlanyp otyr.
— Shaǵyn jáne keńeıtilgen quramda ótetin Eýrazııalyq úkimetaralyq keńestiń (EÚAK) otyrysynyń kún tártibi saýda-ekonomıkalyq yntymaqtastyqtyń keń aýqymdy máselelerin qamtıdy. 27 naýryz kúni EAEO-ǵa múshe memleketterdiń, baqylaýshy elderdiń jáne shaqyrylǵan memleketterdiń delegatsııa basshylary «Digital Qazaqstan — 2026» jyl saıynǵy forýmynyń plenarlyq sessııasyna qatysady. Dástúrli forým jumysyna saıası jáne qoǵam qaıratkerleri, iri IT-kompanııalardyń basshylary men tsıfrlyq sala sarapshylary qatysýy josparlanǵan, — dep habarlady QR SІM.
EÚAK-tyń kezekti otyrysy Rixos Khadisha Shymkent qonaqúıinde, al «Digital Qazaqstan — 2026» forýmy Qyzgaldaq saraiy ǵımaratynda ótedi.
Eske salaıyq, 2026 jyly Qazaqstan Eýrazııalyq ekonomıkalyq odaq organdaryna tóraǵalyq etedi. Yntymaqtastyqtyń negizgi baǵyty jasandy ıntellektini damytýǵa, Eýrazııada logıstıkalyq hab qalyptastyrýǵa, ónerkásip pen agroónerkásip keshenin tsıfrlandyrýǵa, sondaı-aq kedergisiz saýdany keńeıtýge baǵyttalǵan.
