Shymkentte 2,5 myńnan astam kásipkerdiń quqyǵy qorǵaldy

ASTANA. KAZINFORM – Shymkent qalasynyń prokýratýrasy 2,5 myńnan astam kásipker men jeke tulǵanyń quqyqtaryn qorǵady, dep habarlaıdy qala prokýratýrasy.

Prokýratýra jergilikti atqarýshy organdardyń kásipkerlik sýbektilerine qatysty syrtqy jarnama salasyndaǵy qyzmetiniń zańdylyǵyna taldaý júrgizgen.

Taldaý barysynda habarlama bermegen 4286 kásipkerge qatysty memlekettik baqylaý nátıjesinde zań talaptary saqtalmaǵany anyqtalǵan. Atap aıtqanda, olarǵa buzýshylyqtardy óz erkimen joıýǵa múmkindik beretin usynymdar engizilmeı, bul quqyqtary shektelgen.

Qoldanystaǵy zańnamaǵa sáıkes ýákiletti organ tarapynan jarnama paıdalanýshylarǵa anyqtalǵan buzýshylyqtardy erikti túrde joıý úshin tıisti usynymdar berilýi tıis.

- Sonymen qatar jarnama bolyp tabylmaıtyn 127 nysan (mańdaıshalar) negizsiz syrtqy jarnama retinde esepke alynǵan. Sondaı-aq syrtqy jarnama obektilerin ornatpaǵan 115 tulǵa (ǵımaratty jalǵa berýshiler) zańsyz túrde tólemaqy tóleýshiler retinde tanylǵan.

Atalǵan zań buzýshylyqtardyń saldarynan kásipkerlerge jalpy somasy 260 mln teńge kóleminde tólemaqy negizsiz eseptelgen, - dep jazdy baqylaýshy organnan.

Prokýrorlyq qadaǵalaý aktileri boıynsha bıýdjetke zańsyz óndirilgen qarajat qaıtarylyp, 2571 kásipker men jeke tulǵanyń quqyqtary qorǵaldy.

Kináli laýazymdy tulǵalar tártiptik jáne ákimshilik jaýapkershilikke tartyldy.

Qala prokýratýrasy kásipkerlerdi syrtqy jarnamany ornalastyrý kezinde sáýlet jáne qala qurylysy basqarmasyna tıisti habarlama joldap, jarnama kólemine sáıkes tólemaqyny ýaqytyly tóleýge jáne zań talaptaryn saqtaýǵa shaqyrdy.

Aıta keteıik, Qyzylordada kásipkerlerge zańsyz aıyppul salǵandar jaýapqa tartyldy.