Shymkentte 2,5 myń adam esirtki jarnamasyn joıýǵa atsalysty
ShYMKENT. KAZINFORM – Shymkent qalalyq polıtsııa departamenti jergilikti ákimdiktiń uıymdastyrýymen «Shymkent – esirtkisiz qala» naýqanyn ótkizdi.
Іs-sharaǵa jalpy 2500-ge jýyq adam qatysty. Onyń ishinde polıtsııa qyzmetkerleri, prokýratýra, qala jastary, aýdan ákimdikterine qarasty kommýnaldyq mekeme jumysshylary, narkolog-dárigerler, sportshylar, eriktiler men partııa ókilderi de bar.
«Astana» alańynda arnaıy jınalǵan qatysýshylarǵa is-sharanyń maqsaty men mańyzdylyǵyn jetkizilip, nusqamalar berildi.
Shara barysynda esirtki jarnamalaryn anyqtap joıý boıynsha jumystar atqaryldy. Kóshearalyq, aýlaaralyq qaraý júrgizilip, turǵyndarǵa esirtki qylmystaryn jasaǵany úshin zańdy jaýapkershilikti eskertý, azamattardy salaýatty ómir saltyn ustanýǵa shaqyrý jáne nashaqorlyqtyń aldyn alý boıynsha túsindirme jumystaryn júrgizdi.
Іs-shara qorytyndysymen 2332 graffıtı boıaý túrindegi esirtki jarnamalarynyń, olardyń ınternet jelisindegi siltemeleriniń ataýlary joıyldy.
Aktsııa barysynda polıtsııa qyzmetkerleri men belsendi jastardyń qyraǵylyǵynyń arqasynda esirtkiniń zańsyz aınalymyna qatysty quqyq buzýshylyqtar da anyqtaldy.
Máselen, Qarataý jáne Turan aýdandaryn aralaý jumystaryn júrgizý barysynda jergilikti turǵyndardan esirtkige uqsas zattar tabylyp, polıtsııa qyzmetkerlerimen tárkilenip alyndy.
Sonymen qatar, is-sharada ınternet-alaıaqtyqty eskertý maqsatynda arnaıy jadynamalar taratyldy. Turǵyndarmen keri baılanysty nyǵaıtyp, quqyq buzýshylyqtyń kez-kelgen túrine «nóldik tózimdilik» qaǵıdasyn qalyptastyrý men qoǵam arasynda esirtkige qarsy teris kózqaras ornatý baǵytynda jumystar atqaryldy. Polıtseıler qala aýmaǵynda esirtkige qarsy jumystardy ótkizý men oǵan tıimdi tosqaýyl qoıý boıynsha is-sharalar turaqty túrde jalǵasatynyn jetkizdi.
