Shymkentte 2300-den astam turǵyn úı qujatsyz salynǵan
ShYMKENT. KAZINFORM — Shymkentte jer telimderin esepke alý, olardyń zańdylyǵyn baqylaý jáne tıimdi paıdalaný maqsatynda keshendi zerdeleý júrgizilip jatyr.
Qalalyq jer qatynastary basqarmasynyń basshysy Azat Islamovtyń aıtýynsha, qala aýmaǵynda óz betinshe salynǵan turǵyn úılerge quqyq berý máselelerin qaraý úshin arnaıy jumys toby qurylyp, tıisti zerdeleý júrgizilgen. Nátıjesinde qujatsyz salynǵan 2314 turǵyn úı qurylysy anyqtaldy. Olardyń ishinde 1831 úı jaramdy, al 483-i turýǵa jaramsyz dep tanyldy.
— Kóptegen azamattar kezinde alaıaqtardyń arbaýyna túsken. Keıbiri «qujatyn keıin jasap beremiz» degen ýádege aldanyp, tıisti rásimdeýsiz úılerge qonystanǵan. Al keıbirine jalǵan qujattar berilgen. Keıin olardyń zańdyq kúshi sot arqyly joıylǵan. Osyǵan baılanysty óz betinshe salynǵan turǵyn úılerdi zańdastyrý boıynsha tıisti sheshim qabyldanady, — dedi basqarma basshysy.
Sonymen qatar qalada qaýipsizdik talaptaryna saı kelmeıtin jáne turýǵa jaramsyz 187 qurylys nysany buzylǵan.
Spıkerdiń sózinshe, búginde Shymkent qalasynda 283 myń adam jer kezeginde tur. Alaıda qoldanystaǵy zańnama men qalanyń bas josparyna sáıkes, qazirgi tańda azamattarǵa jer telimderi berilmeıdi.
— 2023 jyldan bastap respýblıkalyq mańyzy bar Astana, Almaty jáne Shymkent qalalarynda jer kezegine azamattar tirkelmeıdi. Degenmen turǵyndarǵa elimizdiń basqa óńirlerinde, tirkelgen mekenjaıyna qaramastan, jer kezegine turý múmkindigi berilgen. Birneshe óńirge ótinish berýge bolady. Qaı óńirde kezegi birinshi kelse, jer sol aımaqtan beriledi, — dedi Azat Islamov.
Onyń aıtýynsha, qazirgi tańda qala aýmaǵynyń shamamen 70 paıyzy jeke turǵyn úı sektoryna tıesili.
— Shymkentte kópqabatty turǵyn úıler ornalasqan aýmaq 747 gektar bolsa, jeke turǵyn úıler 10 509 gektardy qamtıdy, ıaǵnı kópqabatty úılerdiń úlesi az. Sondyqtan qalanyń bas josparyna sáıkes, aldaǵy ýaqytta kópqabatty turǵyn úı qurylysyn damytýǵa basymdyq beriledi, — dedi spıker.
Budan buryn Shymkentte zańsyz qurylystarǵa qatysty 125 nysanǵa ákimshilik hattama toltyrylyp, 70 mln teńgeden astam aıyppul salynǵanyn jazǵan edik.