Shymkentte 220-dan asa kásipker áleýmettik taýarǵa saýda ústemesin asyryp qosqan

ShYMKENT. KAZINFORM – Baǵany turaqty baqylaýda ustaý maqsatynda jyl basynan beri 2 myńnan astam kásipkerdiń qyzmetine taldaý jasalǵan. Nátıjesinde shekti saýda ústemesin 15 paıyzdan asyrǵan 226 kásipker ákimshilik jaýapkershilikke tartylǵan.

Qalalyq aýyl sharýashylyǵy jáne veterınarııa basqarmasynyń basshysy Talǵat Mekambaevtyń aıtýynsha, Úkimet tarapynan áleýmettik mańyzy bar azyq-túlik taýarlarynyń 19 ataýdan turatyn tizbesi bekitilgen.

– Jyl basynan beri azyq-túlik baǵasynyń edáýir ósýi tek Shymkentte emes, respýblıka kóleminde baıqaldy. Máselen, sıyr eti 31 paıyzǵa qymbattady. Baǵanyń ósýine jol bermeý úshin Úkimet tarapynan sıyrlardy tirideı shetelge shyǵarýǵa jáne et eksportyna shekteý qoıyldy, - dedi ol.

Degenmen, sońǵy ýaqytta sıyr etimen qatar taýyq eti men sút ónimderiniń baǵasy ósken. Buǵan qalanyń syrttan keletin ónimderge táýeldiligi áser etti.

– Mal azyǵynyń qymbattaýy et baǵasynyń ósýine tikeleı yqpal etti. Shymkentke jetkiziletin ettiń 80 paıyzy Túrkistan oblysynan ákelinedi. Al kókónister Ózbekstannan, Qyrǵyzstannan jáne soltústik óńirlerden jetkiziledi. Baǵa osy faktorlarǵa tikeleı baılanysty. Degenmen, qalany tolyq qamtý múmkin bolmaǵanymen, iri saýda jelileri men taýar óndirýshi kásiporyndarmen kelisim-sharttar jasaldy. Qazirgi tańda 90-ǵa jýyq saýda nysanynda áleýmettik mańyzy bar azyq-túlik taýarlary belgilengen baǵada satylyp jatyr, - dedi ol.

Budan buryn Shymkentte 1 300-den asa oqýshyǵa ystyq tamaq vaýcheri rásimdelmegenin jazǵan edik.