Shymkentte 21 jastaǵy qyzdyń ólimi: tergeý isine mınıstrlikten mamandar jiberildi

ASTANA. KAZINFORM — Shymkent qalasynda qyzdy óltirý faktisi boıynsha qozǵalǵan qylmystyq isti tergeý úshin ortalyq apparattan mamandar jiberildi. Bul týraly QR Іshki ister mınıstriniń orynbasary Sanjar Ádilov málim etti.

- Nuraıdyń ólimine kúdikti adam qamaýǵa alyndy. Tergeý amaldary jalǵasyp jatyr, sot-medıtsınalyq saraptamalar jasalady. Kúdikti sottyń sanktsııasymen eki aıǵa qamaldy. Osy qylmystyq is aıasynda istiń barlyq mán-jaıy jan-jaqty, tolyq, obektıvti zertteledi, - dedi S. Ádilov Senatta tilshiler suraǵyna jaýap bere otyryp.

Osy oraıda ol Shymkent qalasy departamentiniń jedel-tergeý toby atalǵan iske qatysty tergeý amaldaryn jalǵastyryp jatqanyn aıtty.

- Osy qylmystyq is boıynsha Shymkentke ortalyq apparattyń tájirıbeli basshylarynyń toby jiberildi. Olardyń arasynda bul Krımınaldyq polıtsııa departamenti, Tergeý departamentiniń mamandary qamtyldy. Tergeý barysyn erekshe baqylaýda ustap turmyz, - dedi mınıstrdiń orynbasary.

Eske salsaq, Prezıdent Qasym-Jomart Toqaev Shymkenttegi boıjetkenniń ólimine qatysty Bas prokýratýraǵa tapsyrma berdi.

20 qańtar kúni Іshki ister mınıstrligi Shymkent polıtsııa departamentinde kadrlyq sheshimder jasaǵanyn málim etti. Bul sheshimder 21 jastaǵy stýdent Nuraı Serikbaıdyń óliminen keıin qabyldandy.

Aıta keteıik, marqum N. Serikbaıdyń ólimine kúdikti retinde 28 jastaǵy Shymkent qalasynyń turǵyny ustalyp, ýaqytsha ustaý ızolıatoryna qamaldy.