Shymkentte 21 jastaǵy qyzdy pyshaqtap óltirdi degen kúdikti ustaldy
ShYMKENT. KAZINFORM – Shymkentte jedel-izdestirý is-sharalary barysynda 21 jastaǵy qyzdy óltirdi degen kúdikti er adam ustaldy.
Іzdeý jumystaryna qalalyq Polıtsııa departamentiniń jeke quramy tolyqtaı jumyldyryldy. Qalanyń kireberis jáne shyǵaberis baǵyttarynda baqylaý kúsheıtilip, aýmaqty jan-jaqty tekserý júrgizildi.
Kúdikti qala aýmaǵynan shamamen 10 shaqyrym qashyqtyqtaǵy ashyq jerde anyqtalyp, ustaldy.
– Qazirgi tańda 28 jastaǵy Shymkent qalasynyń turǵyny ýaqytsha ustaý ızolıatoryna qamaldy. Aldyn ala málimetke sáıkes, kúdikti marqummen buryn tanys bolǵan. Qylmystyń sebepteri men mán-jaıy tergeý barysynda anyqtalady, - dep habarlady qalalyq Polıtsııa departamenti.
Atalǵan jaıt boıynsha qylmystyq is qozǵalyp, keshendi jedel-tergeý sharalary júrgizilip jatyr.
Budan buryn Shymkentte 21 jastaǵy qyzdy pyshaqtap óltirgen adam izdestirilip jatqanyn jazǵan edik.