Shymkentte 21 jastaǵy boıjetkendi óltirgen kúdikti ómir boıyna bas bostandyǵynan aıyrylýy múmkin

ShYMKENT. KAZINFORM — Shymkentte 21 jastaǵy Nuraı Serikbaıdyń asa qatygezdikpen óltirilýine baılanysty jábirlenýshi taraptyń advokaty Aıanhan Omarov pikir bildirdi.

Onyń málimdeýinshe, qylmystyq is Qylmystyq kodekstiń 99-baby 2-bóligi 5-tarmaǵyna («asa qatygezdikpen adam óltirý») sáıkes qaıta saralandy. Bul bap boıynsha 15-ten 20 jylǵa deıin nemese ómir boıyna bas bostandyǵynan aıyrý jazasy qarastyrylǵan. Atalǵan aqparatty Shymkent qalasy Polıtsııa departamenti rastady.

Sondaı-aq advokat qylmyskerdiń ómir boıyna bas bostandyǵynan aıyrý jazasyn alýy tıis ekenin atap ótti.

— Jas qyzdy nekege turýǵa májbúrlep, ol kónbegen soń qyr sońyna túsip, stalkıng jasap, aqyrynda asa qatygezdikpen adam óltirdi. Qylmyskerdiń bul áreketi — qaı jaǵynan alyp qarasaq ta, eshbir aqtaýǵa kelmeıdi. Meniń oıymsha, sot otyrystary ashyq ótip, tikeleı efır arqyly halyqqa kórsetilýi qajet, — dep jazdy ol áleýmettik jelidegi paraqshasynda.

Qazirgi ýaqytta kúdiktige úsh bap boıynsha aıyp taǵylǵan:

125-1-bap — «Nekege turýǵa májbúrleý»;

115-1-bap — «Stalkıng»;

99-bap 2-bóligi 5-tarmaǵy — «Asa qatygezdikpen adam óltirý».

Budan buryn Shymkentte 21 jastaǵy qyzdy pyshaqtap óltirdi degen kúdikti ustalǵanyn jazǵan edik.

Polıtsııa qaza tapqan stýdent qyzdyń otbasy jarııalaǵan derekterge jaýap berdi. 

Prezıdent Shymkenttegi boıjetkenniń ólimine qatysty Bas prokýratýraǵa tapsyrma berdi. 

Qyzdy óltirý faktisi boıynsha qozǵalǵan qylmystyq isti tergeý úshin ortalyq apparattan mamandar jiberildi. 

Boıjetkenniń óliminen keıin óz qyzmetine selqos qarady degen kúdikpen polıtsııa qyzmetkerlerine qylmystyq is qozǵaldy.