Shymkentte 200 myń teńgege bástesken jastar kóshede kólik jarysyn uıymdastyrǵan
ShYMKENT. KAZINFORM — Shymkentte jol qaýipsizdigine qater tóndirgen kólik jarysyna qatysýshylar jaýapqa tartyldy.
Polıtsııa qyzmetkerleri áleýmettik jelilerge júrgizilgen monıtorıng barysynda qala kósheleriniń birinde qaýipti manevrler jasap, kólik jarysyn uıymdastyrǵan júrgizýshilerdiń beınejazbasyn anyqtady.
Beınejazbadan olardyń qozǵalys kezinde qarsy baǵyttaǵy jolaqqa shyǵyp, jol erejesin óreskel buzǵany, ózge júrgizýshilerge qaýip tóndirip, apattyq jaǵdaı týǵyzǵany baıqalǵan. Sondaı-aq atalǵan áreketterin vıdeoǵa túsirip, áleýmettik jelilerde jarııalaǵan.
Tekserý barysynda qatysýshylardyń biriniń júrgizýshi kýáliginsiz kólik tizgindegeni belgili boldy.
— Jastardyń mundaı qaýipti áreketke barýyna 200 myń teńgege bástesý sebep bolǵan. Olar utysqa jetip, áleýmettik jelige áserli beınejazba jarııalaýdy maqsat etken, — delingen qalalyq polıtsııa departamentiniń habarlamasynda.
Jol qozǵalysy qaǵıdalaryn óreskel buzǵan azamattarǵa qatysty ákimshilik hattamalar toltyryldy. Sonymen qatar, olardyń ekeýi usaq buzaqylyq jasaǵany úshin 7 táýlikke ákimshilik qamaýǵa alyndy.
Buǵan deıin Shymkentte júrgizýshi kýáligin alý emtıhany kezinde avtokólik aýdarylyp ketkenin jazǵan edik.
