Shymkentte 200-den astam bala ishek ınfektsııasyn juqtyrdy
ShYMKENT. KAZINFORM — Shymkentte shilde aıynyń basynan beri ishek ınfektsııasynyń 280 jaǵdaıy tirkeldi. Onyń ishinde 203 bala dıareıa, júrek aıný jáne qusý belgilerimen medıtsınalyq kómekke júgingen.
Qalalyq sanıtarııalyq-epıdemıologııalyq baqylaý departamentiniń málimetinshe, 169 jaǵdaıda ınfektsııa taǵam arqyly juqqan. Onyń 84-i úı jaǵdaıynda daıyndalǵan taǵammen, 85-i jemis-jıdekpen baılanysty bolsa, 111 jaǵdaıda aýrýdyń turmystyq-qatynastyq jolmen juqqany boljanyp otyr.
Mamandardyń aıtýynsha, jazda ishek ınfektsııalarynyń taralý qaýpi kúsheıedi.
— Jaz mezgili ishek ınfektsııalarynyń maýsymdyq órshý kezeńi bolyp sanalady. Ystyq aýa raıy aýrý qozdyrǵyshtarynyń belsendi taralýyna áser etedi. Daıyn taǵamdar tez buzylady. Durys jýylmaǵan jemis-jıdekti tutyný, ashyq sý aıdyndarynda shomylý jáne ruqsat etilmegen saýda oryndarynan satyp alynǵan daıyn taǵamdy jeý arqyly juqtyrý qaýpi artady, — dep túsindirdi Shymkent qalasynyń sanıtarııalyq dárigerleri.
Tirkelgen naýqastardyń shamamen tórtten úshi — 14 jasqa deıingi balalar. Epıdemıologtar muny balalarǵa kútim jasaý jáne tamaqtandyrý talaptarynyń saqtalmaýymen, sondaı-aq jeke bas gıgıenasy daǵdylarynyń jetkilikti deńgeıde qalyptaspaýymen baılanystyrady.
Sonymen qatar departament áleýmettik jeliler men buqaralyq aqparat quraldarynda taraǵan qaýyn-qarbyzdan jappaı ýlaný týraly aqparatty joqqa shyǵardy. Vedomstvonyń málimetinshe, shilde aıynda qarbyz, qaýyn nemese nıtrattarǵa baılanysty birde-bir ýlaný jaǵdaıy tirkelmegen.
— Іshek ınfektsııalaryn kóbine «las qol aýrýy» dep ataıdy. Sondyqtan tamaq daıyndaý jáne tamaqtaný aldynda, kósheden kelgennen keıin, dárethanaǵa barǵan soń jáne balaǵa kútim jasar aldynda qoldy sabyndap muqııat jýý qajet. Kezdeısoq saýdagerlerden daıyn taǵam satyp almaý, tez buzylatyn azyq-túlikti bólme temperatýrasynda qaldyrmaý jáne sapasyna kúmándi sýdy ishpeý kerek. Eger sýdyń sapasyna kúmán týyndasa, ony qaınatyp nemese bótelkedegi sýdy paıdalanǵan jón. Aýrýdyń alǵashqy belgileri baıqalǵan jaǵdaıda ózdiginen emdelmeı, dereý dárigerge qaralý qajet, — dedi mamandar.
Bıylǵy alǵashqy alty aıda Shymkentte ishek ınfektsııasynyń 473 jaǵdaıy tirkelgen. Byltyrǵy osy kezeńde bul kórsetkish 482 bolǵan.
Aýrý dıagnozy 14 jasqa deıingi 316 baladan rastaldy. Aldyn ala baǵalaý boıynsha, juqtyrýdyń 49,3%-y taǵam arqyly, 50,7%-y turmystyq-qatynastyq jolmen taraǵan.
Sondaı-aq birinshi jartyjyldyqta dızenterııanyń 16 jaǵdaıy tirkelip, onyń 13-i balalar arasynda anyqtalǵan. Ótken jyldyń osy kezeńinde mundaı jaǵdaı múlde tirkelmegen.
— Dızenterııa (shıgellez) — negizinen Shigella bakterııalary qozdyratyn, toq ishekti zaqymdap, aǵzanyń jalpy ýlanýymen sıpattalatyn qaýipti ishek ınfektsııasy, — dep málim etti departament.
Buǵan deıin Qazaqstanda 4739 adam donorlyq aǵza kezeginde turǵany týraly habarlaǵan edik.
