Shymkentte 200-den asa adamdy aldaǵan qarjy pıramıdasynyń jumysy toqtatyldy

ASTANA. KAZINFORM – Qarjylyq monıtorıng agenttiginiń Shymkent qalasy boıynsha departamenti Ansar Gold atty qarjy pıramıdasynyń qyzmetin áshkerelep, toqtatty.

Ózderin zergerlik buıymdar satatyn kompanııa retinde tanystyrǵan kúdiktiler salymshylarǵa bes aı ishinde salynǵan qarajattyń 40–60%-y kóleminde aı saıyn tabys túsetinin jáne negizgi kapıtaldyń saqtalýyna kepildik beriletinin ýáde etken.

Alaıda, is júzinde tólemder taýar satýdan túsken kiristen emes, jańa qatysýshylardyń salymdary esebinen júzege asyrylǵany anyqtaldy.

QMA málimetinshe, qarjy pıramıdasyna 200-den astam adam tartylyp, 400 mln teńgeden astam qarjy salynǵan.

Sondaı-aq kúdiktiler ózderiniń týystaryn «drop» retinde tartyp, olardyń bank kartalaryn paıdalaný arqyly basqa qatysýshylardan túsken aqshany qolma-qol sheship otyrǵan.

- Qarjy pıramıdasyn uıymdastyrýshy qamaýǵa alyndy. Qazirgi ýaqytta oǵan tıesili avtokólik pen turǵyn úıge shekteý qoıyldy, - dep jazdy agenttikten.

QR Qylmystyq-protsestik kodeksiniń 201-babyna sáıkes ózge aqparat jarııalaýǵa jatpaıdy.

Aıta keteıik, Qarjy pıramıdasyna baılanysty sottalǵan bloger Meıirhan Shernııazov bostandyqqa shyqty.