Shymkentte 2-3 qyrkúıekte birqatar shaǵynaýdanda gaz óshiriledi
ShYMKENT. KAZINFORM – Shymkentte birneshe shaǵynaýdan men ındýstrıaldy aımaqta gaz berý eki táýlikke toqtatylady. Shekteý gaz jelilerin kúzgi-qysqy kezeńge daıyndaý jumystaryna baılanysty engiziledi.
Gaz berý ýaqytsha Turan-1 jáne Turan-2 shaǵynaýdandarynda, Jolbarys bı kóshesindegi úılerde, «Adııa» turǵyn úı kesheninde, sondaı-aq «Tassaı» ındýstrıaldy aımaǵyndaǵy óndiristik kásiporyndarda toqtatylady.
«QazaqGaz Aimaq» AQ Shymkent óndiristik fılıalynyń málimetinshe, ýaqytsha shekteý Turan-2 shaǵynaýdanyndaǵy 108 turǵyn úıdi qamtıdy. Budan bólek kompanııa jarııalaǵan tizimde 204 kópqabatty úı kórsetilgen. Eki táýlik ishinde mamandar gaz qubyrlaryn qaıta qosý jumystaryn júrgizedi.
— Kúzgi-qysqy kezeńge daıyndyqqa baılanysty 2-3 qyrkúıek kúnderi gaz berý eki táýlikke ýaqytsha toqtatylady. Osy aralyqta gaz qubyrlaryn qaıta qosý jumystary júrgiziledi. Atalǵan aýmaqtardyń turǵyndarynan barlyq gaz qurylǵylary men krandardyń jabyq bolýyn qadaǵalaýdy, al gaz qaıta berilgen kezde fılıal qyzmetkerleriniń úılerge kirip-shyǵýyna múmkindik jasaýdy suraımyz. Gazdyń ıisi sezilgen jaǵdaıda dereý 104 nómirine habarlasý qajet, — delingen habarlamada.
Buǵan deıin Shymkentte jer qazý jumystary kezinde jerasty gaz qubyry zaqymdalyp, órt shyqqan bolatyn. Saldarynan 1500-den astam jeke úı, jeti kópqabatty úıdegi 340 páter, sondaı-aq ondaǵan kommýnaldyq-turmystyq jáne óndiristik nysan ýaqytsha gazsyz qalǵan. Jumysty júrgizgen merdiger uıymǵa qatysty tekserý bastaldy.
