Shymkentte 18 myńǵa jýyq júrgizýshi kólik salyǵyn tólemegen

Shymkent qalasy boıynsha Memlekettik kirister departamentiniń málimetinshe, 2025 jylǵy salyq kezeńi boıynsha qalada jeke tulǵalardyń menshiginde tirkelgen 447 myńnan astam kólik quralyna jalpy somasy 7,5 mlrd teńge kólik salyǵy eseptelgen.

Salyq kodeksine sáıkes, 24 myńǵa jýyq jeke tulǵaǵa 500 mln teńge kóleminde salyqtyq jeńildikter qarastyrylǵan.

Vedomstvonyń málimdeýinshe, 2025 jylǵa arnalǵan kólik salyǵyn tóleý merzimi bıylǵy 1 sáýirde aıaqtaldy.

Qala turǵyndaryn habardar etý maqsatynda ekinshi deńgeıli bankterdiń mobıldi qosymshalary, onyń ishinde Kaspi jáne Halyk arqyly push-habarlamalar jiberilgen.

– Eseptelgen somany ýaqytyly tólemegen jaǵdaıda árbir keshiktirilgen kún úshin ósimpul esepteledi. Bir aılyq eseptik kórsetkishten asatyn bereshek boıynsha habarlama tabys etilgennen keıin 30 jumys kúninen soń salyq buıryǵy shyǵarylyp, 5 jumys kúni ótken soń jeke sot oryndaýshylaryna májbúrlep óndirip alý úshin joldanady. Sonymen qatar, bereshek somasy 40 AEK-ten asqan jaǵdaıda azamattardyń elden shyǵýyna ýaqytsha shekteý qoıylýy múmkin. Bul rette jeke sot oryndaýshylary qaryz somasynan bólek, óndirip alý barysynda qosymsha 25%-ǵa deıin tólem óndirip alady, – dedi departamenttiń bólim basshysy Juman Sherhan.

Departament ókilderi júrgizýshilerdi artyq shyǵyndar men keleńsiz jaǵdaılardyń aldyn alý úshin kólik salyǵyn ýaqytyly tóleýge shaqyrdy.

– Qazirgi tańda Shymkentte 17 987 jeke tulǵanyń ótken jyldardan qalǵan jalpy somasy 1 mlrd 28 mln teńge bereshegi bar. Atalǵan bereshekter boıynsha jeke sot oryndaýshylary tarapynan májbúrlep óndirip alý sharalary júrgizilip jatyr, – dedi spıker.

Budan buryn Shymkentte 438 255 kólik tirkelgenin jazǵan edik. Onyń ishinde eń kóbi, ıaǵnı 379 132-si – jeńil avtokólik. Sonymen qatar, 152 867 kólik 20 jyldan astam ýaqyttan beri paıdalanylyp keledi.

Budan bólek, qala joldarynda 32 594 júk kóligi, 6 309 avtobýs jáne 1 487 mototsıkl júredi.