Shymkentte 17 jasar qyzdy alyp qashyp, zorlaǵan — polıtsııa jaýap berdi

ShYMKENT. KAZINFORM — Shymkentte kámeletke tolmaǵan qyzdyń urlanyp, zorlanǵany týraly áleýmettik jelide aqparat tarady. Qalalyq Polıtsııa departamenti atalǵan derek boıynsha qylmystyq is qozǵalǵanyn habarlady.

Beınejazbada birneshe áıeldiń qyzdy kólikten kúshtep shyǵaryp jatqanyn, keıin er adamnyń ony qolyna kóterip alyp ketkenin kórýge bolady. Oqıǵa kóptegen kýágerdiń kóz aldynda bolǵan. 

— Shymkentten shyqqan kámeletke tolmaǵan qyz óz erkinen tys urlanyp, bir úıge jetkizilgenin málimdedi. Onyń aıtýynsha, kúdiktiniń týystary ony sol úıde qalýǵa kóndirgen. Al ol eshqandaı shaǵymy joq ekeni týraly óz qolymen hat jazýdan bas tartqannan keıin, týystary birlesip zorlaý áreketin uıymdastyrǵan. Onyń sózinshe, osy ýaqytqa deıin eshkim jaýapkershilikke tartylmaǵan, — delingen habarlama jazbasynda.

Beınejazbadaǵy aqparatqa sáıkes, jábirlenýshiniń jasy — 17-de. Ony Saryaǵash aýdanyna kúshtep áketken.

Osy oqıǵaǵa baılanysty Kazinform tilshisiniń suraýyna qalalyq Polıtsııa departamenti túsinik berdi.

— Shymkent qalasy turǵynynyń aryzy boıynsha qylmystyq is qozǵaldy. Oqıǵaǵa qatysqan barlyq tulǵa polıtsııa basqarmasyna jetkizildi. Qazirgi tańda barlyq oqıǵanyń mán-jaıyn anyqtaý úshin qajetti keshendi tergeý is-sharalary júrgizilip jatyr, — delingen resmı habarlamada.

Sondaı-aq tergeý qorytyndysy boıynsha tıisti protsessýaldyq sheshim qabyldanatyny aıtyldy.

— Zań talaptaryn buzǵan tulǵalar qoldanystaǵy zańnamaǵa sáıkes mindetti túrde jaýapkershilikke tartylady, — dep málimdedi vedomstvo ókilderi.

Budan buryn Polıtsııa Shymkentte qaza tapqan stýdent qyzdyń otbasy jarııalaǵan derekterge jaýap bergenin jazǵan edik. 

Shymkent qalasynda qyzdy óltirý faktisi boıynsha qozǵalǵan qylmystyq isti tergeý Іshki ister mınıstrliginiń baqylaýyna alynǵany habarlandy.