Shymkentte 17 gaz taratýshy mekemege suıyq otyn talapqa saı bólinbegen

ShYMKENT. KAZINFORM – Búginde Shymkentte 4 gaz toltyrý stantsııasy jáne 200-den avtogaz quıý stantsııasy jumys isteıdi.

Básekelestikti qorǵaý jáne damytý agenttigi Shymkent qalasy boıynsha departamentiniń málimetinshe, bıyl qalalyq energetıka jáne ınfraqurylymdy damytý basqarmasyna qatysty zańsyzdyqtar anyqtalyp, saldarynan 17 sýbektige suıytylǵan munaı gazy talapqa saı bólinbegeni belgili boldy.

Atap aıtqanda, 5 gaz taratýshy mekemege tıesili mólsherden 252 tonna artyq gaz taratylǵan. Al 9 sýbektige belgilengen kólemnen 360 tonna kem bólingen. Sonymen qatar gaz alýǵa quqyǵy joq 3 sýbektige 180 tonna suıyq otyn jetkizilgen.

– Tıisti basqarma suıytylǵan munaı gazyn bólý barysynda gaz taratýshy uıymdarǵa teń quqyq bermeı, olardyń suranysyn tolyq kólemde qamtamasyz etpegen. Sonyń saldarynan naryq sýbektileriniń quqyqtary shektelip, negizsiz gaz tapshylyǵynyń týyndaýyna jol berilgen. Basqarmaǵa habarlama jiberilip, kemshilikterdi joıýǵa bir aı ýaqyt berildi. Belgilengen merzimde kemshilikter túzetilip, jaǵdaı turaqtala bastady, – dedi departament basshysy Ernar Qosbaev.

Onyń málimdeýinshe, qala aýmaǵynda suıytylǵan munaı gazy tapshylyǵynyń aldyn alý úshin qazirgi kezde pılottyq júıe engizilip jatyr. Atalǵan júıe gazdy bólýdi avtomattandyrýdy, ıaǵnı zamanaýı tehnıkalyq quraldardy qoldaný arqyly adam faktorynsyz júzege asyrýdy kózdeıdi.

– Bul máselege baılanysty basqarmaǵa jyl saıyn aryz-shaǵym túsedi. Eger pılottyq júıe tolyqtaı qoldanysqa engizilse, gazdy bólý protsesi ashyq ári ádiletti túrde júzege asady, – dedi ol.

Resmı málimetke súıensek, ótken jyly qalada 463 myńnan astam kólik tirkelgen, olardyń 66 myńnan astamy (14,3%) suıytylǵan gaz qoldanady.

Budan buryn Shymkentte júrgizýshiler gaz quıý beketterinde kezek kútýge májbúr bolǵanyn jazǵan edik.