Shymkentte 151 adamdy san soqtyrǵan alaıaqtarǵa qatysty sot úkimi shyqty
ShYMKENT. KAZINFORM. Shymkent qalasynyń qylmystyq ister jónindegi aýdanaralyq sotynda elimizdiń birneshe óńirindegi jalpy sany 151 adamdy san soqtyrǵan úsh adamǵa úkim shyqty. Eki áıel, bir er adamǵa Qylmystyq kodekstiń 217-baby 3-bóliginiń 2-tarmaǵy, 217-baby 2-bóliginiń 1 jáne 4-tarmaqtarymen aıyp taǵyldy.
Sottyń málimetinshe, sottalýshylardyń biri áıel azamaty 2019 jyly qyrqúıek aıynda Shymkent qalasynda «Paıyzsyz baspana» turǵyn úı kooperatıvin ashyp, ózin basshy etip taǵaıyndaǵan. Al, 2021 jyldyń tamyz aıynda kopperatıv salymshylarynyń qatysýymen ótken jıynda basshy retinde sottalýshynyń ekinshisi taǵaıyndalǵan. Sodan keıin ol ekeýi kooperatıv operatorymen aldyn ala sóz baılasyp, 2019-2021 jyldar aralyǵynda Instagram arqyly Shymkent, Almaty, Astana jáne basqa da oblystyq mańyzy bar qalalarda salymshylardan aqsha jınaǵan. Ol qarajatty qabyldanǵan mindettemelerdi qamtamasyz etetin kásipkerlik qyzmetke paıdalanbaı, sottalýshylardyń ekeýi 135 jábirlenýshige 171 mln teńge mólsherinde shyǵyn keltirgen. Al, operator áıel 16 jábirlenýshini 15 mln teńge shyǵynǵa batyrǵan.
Sot otyrysynda kooperatıvti ashqan áıel kinásin tolyq moıyndady. Onyń qorǵaýshysy sottan jas balalarynyń bolýyna jáne kinásin tolyq moıyndaýyna baılanysty eń tómen jaza taǵaıyndaýdy surady.
2021 jyly kooperatıvke basshy bop taǵaıyndalǵan sottalýshy da kinásin moıyndap, bala kezinen múmkindigi shekteýli jan bolǵandyqtan ózine bas bostandyǵynan aıyrmaıtyn jaza taǵaıyndaýdy surady.
Úshinshi sottalýshy da kinásin moıyndap, 10 jábirlenýshi oǵan keshirim berýine baılanysty qorǵaýshysy ekeýi sottan bas bostandyǵynan aıyrmaıtyn jeńil jaza berýdi surady.
Sot úkimimen sottalýshylardyń ekeýi Qylmystyq kodekstiń 217-baby 3-bóliginiń 2-tarmaǵymen kináli dep tanyldy. Kooperatıvti quryp, oǵan 2019-2021 jyldar aralyǵynda basshylyq etken áıelge 6 jyl 8 aıǵa bas bostandyǵynan aıyrý jazasy taǵaıyndaldy. Kooperatıvke 2021 jyldan bastap basshylyq etken er adamǵa 5 jyl 6 aıǵa bas bostandyǵynan aıyrý jazasy berildi. Úshinshi sottalýshy áıel Qylmystyq kodekstiń 217-baby 2-bóliginiń 1 jáne 4-tarmaqtarymen kináli dep tanylyp, 3 jylǵa bas bostandyǵynan aıyryldy. Sottalýshylardyń úsheýi de jazany qaýipsizdigi barynsha tómen mekemelerinde óteıdi. Sot úkimi zańdy kúshine engen joq.
Aıta keteıik, sottalýshylar qylmysty 2019 jyldyń qyrkúıegi men 2022 jyldyń qańtar aralyǵynda, ıaǵnı, Qylmystyq kodekstiń 217-baby 3-bóligine (Qarjylyq pıramıda qurý jáne oǵan basshylyq etý) túzetýler engizilgenge deıin jasaǵan.
